Бириистэптэр кирэдьиит төлөбүрүн төннөрдүлэр

Саха сиринээҕи Суут бириистэптэрин управлениетын Дьокуускай куораттааҕы салаата кирэдьиит төлөбүрүн төннөрөр туһунан дьыаланы түмүктээтэ.

Дьокуускай олохтооҕо арахсыбыт кэргэнин утары суукка ирдэбил түһэрбит: кэргэнниилэр арахсыыларын кэнниттэн иэс улахан аҥаарын соҕотоҕун төлөөбүтүнэн, кирэдьииккэ иэстэрин сорҕотун төннөрүүнү ирдээбит. Суут кирэдьиит дуогабарынан ылыллыбыт эбэһээтэлистибэлэрин эр киһи толорботох буолан, кирэдьиит сууматыттан аҥаарын төлүүрүгэр, ону тэҥэ юридическай ороскуоттары толуйарга уурбут. Ол уопсай иэс суумата 1,6 мөлүйүөнтэн тахса солкуобайга тэҥнэспит. Ол гынан баран, суут уурааҕын ылыммытын да кэннэ, иэстээх киһи иэһин төлүүргэ тиэтэйбэтэх.

Управление  пресс-сулууспата иһитиннэрбитинэн,  бириистэп иэстээх киһи баан счеттарыгар баар харчыны былдьыырга, Арассыыйа Федерациятыттан тахсар быраабын быстах кэмҥэ хааччахтыырга, толоруу төлөбүрүн хомуйарга уонна иэстээх киһи «Тойота Лэнд Круизер» массыынатын, ону тэҥэ үс сир учаастагын уонна кинилэргэ баар дьиэлэрин регистрациялыырын боборго дьаһал таһаарбыт. Онон иэстээх киһи ирдэбили барытын толорорго күһэллибит.