«Битва шефов» биэриигэ Саха сириттэн шеф-повар кытынна

“Пятница!” ханаалга “Битва шефов” биэриигэ Саха сириттэн Дьокуускай биир эрэстэрээнин шеф-повара 37 саастаах Александр Ерохин кытта сылдьар. Биэриигэ биллэр асчыттар Константин Ивлев уонна Ренат Агзамов киирсэллэр.

— Мин кастиннарыгар 3-4 төгүл кыттыбытым, сайаапкаларын толорбутум. Дьүүллүүр сүбэҕэ перловка куруппаттан каракатицалаах ордзотто диэн бүлүүдэни уонна барбекю тумалаах, шпинаттаах, бараан оҕотун этиттэн каре оҥорон амсаттым. Олох үрдүк таһымҥа устубуттара. Миигин онтон кэлэр түһүмэххэ ыҥырдылар. Билигин да атын күрэстэһээччилэри кытта сибээстэһэ олоробун, — диэн Александр «ЯкутияDaily» саайтка кэпсээтэ.

Кини бу бырайыак иннинэ Константин Ивлевтыын билсэр эбит. 2016 сыллаахха социальнай ситим нөҥүө билсибиттэр. Ол эрээри, кастиҥҥа ол сабыдыаллаабатах.

“Битва шефов” биэрии “Пятница!” ханаалга бүгүн, атырдьах ыйын 21 күнүгэр киэһэ 6 чааска көстүөхтээх диэн СИА суруйар.