БКЭ-ҕэ 100 баалы ылбыт 87 оҕо 100-түү тыһ. солк. бириэмийэни тутта

СӨ Ил Дарханын Айсен Николаев быһаарыытынан, 2022 сылтан БКЭ-ҕэ муҥутуур баалы ылбыт үөрэнээччилэр, итиэннэ кинилэр педагогтара, 100-түү тыһыынча солкуобай кээмэйдээх биир кэмнээх харчынан бириэмийэни ылаллар.

Бу сыллар усталарыгар өрөспүүбүлүкэ 87 сүүс бааллааҕа бары бириэмийэни тутта. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Быйыл үрдүкү көрдөрүүнү — 100 баалы выпускниктар биэс биридимиэккэ ситистилэр: нуучча тылыгар, профильнай математикаҕа, химияҕа, биологияҕа уонна литератураҕа.

Үс үөрэнээччи биирдэ иккилии биридимиэккэ 100-түү баалы ыллылар: Өрөспүүбүлүкэтээҕи лиссиэй-интэринээт выпускнига Эркин Ноговицын (нуучча тыла уонна химия), Арктическай оскуола выпускнига Диана Оразбаева (нуучча тыла уонна биология), уонна В.П. Ларионов аатынан физико-тэхиниичэскэй лиссиэй выпускнига Кирилл Степанов (нуучча тыла уонна химия).

«Инникитин үөрэх систиэмэтэ өссө үчүгэйдик үлэлиирин, оттон үөрэх хаачыстыбата үүнэрин туһугар барытын оҥоруохпут диэн эрэнэбин. Өрөспүүбүлүкэҕэ БКЭ орто баалын бүтүн Арассыыйатааҕы таһымҥа чугаһатар сорук инники турар», — диэн СӨ Ил Дархана Айсен Николаев эрдэ бэлиэтээбитэ.