БКЭ-ни тохтотор туһунан сокуон барыла Госдуумаҕа киирдэ

Бүгүн, бэс ыйын 23 күнүгэр, Госдуумаҕа Биир кэлим эксээмэни суох гынар туһунан сокуон барылын көрүөхтэрэ. Бу сокуон барылын ЛДПР фракция дьокутааттара оҥорон киллэрдилэр. 

ЛДПР фракциятын салайааччытын солбуйааччы Ярослав Нилов  Telegram-ханаалыгар суруйбутунан, БКЭ үөрэнээччи дьиҥнээх билиитин таһымын көрдөрбөт, бу эксээмэн тула бааллары үрдэтии, дааннайдары булкуйуу тахса турар, оҕолор ньиэрбэлэрэ тулуйбакка, бэйэҕэ тиийинэр түбэлтэлэрэ да тахсара төрүөт буолбут.

Онон дьокутааттар Биир кэлим эксээмэн оннугар урукку курдук, сүрүн уопсай уонна орто уопсай үөрэҕирии бырагырааматынан судаарыстыбаннай эксээмэннэргэ көһөргө этии киллэрэллэр.

Бу иннинэ «Рособрнадзор» иһитиннэрбитинэн, БКЭ билиҥҥи көрүҥэ балаһыанньаҕа сөп түбэһэр, ону ааһан, сыллата саҥа уларытыылар киллэриллэн, тупсарыы барар диэн СИА суруйар. БКЭ-ни туттарбыт оҕолор үөрэх туттарса атын куоракка бара сатаабакка, дьиэлэриттэн олорон, биэс үөрэххэ тэҥинэн туттарсар кыахтаахтарынан табыгастаах.