БКЭ-тэн үүрүллүбүт оҕо ахсаана 500-һү куоһарда

Дойду үрдүнэн икки нэдиэлэ устата 500-чэкэ үөрэнээччини биир кэлим эксээмэнтэн (БКЭ) үүрбүттэр.

Кинилэртэн аҥаардарыгар араас оҥоһуктаах шпаргалкалар булуллубуттар. Бу туһунан Рособрнадзор чахчыларыгар сигэнэн ТАСС иһитиннэрдэ. Итини таһынан араас биричиинэнэн 483 оҕо эксээмэни ситэ суруйбатаҕа биллэр.

«БКЭ кэмигэр төлөпүөннээх — 153, кинигэлээх — 283 оҕо тутуллан үүрүллүбүт», — диэн биэдэмистибэҕэ чуолкайдаатылар. Маннык чахчылар бэс ыйын 4 күнүгэр бэлиэтэммиттэр.

Выпускниктар өссө элбэх эксээмэннэри туттараллара хаалла. Бэс ыйын 5 күнүгэр 11 кылаас үөрэнээччилэрэ биологияны, географияны, омук тылын талан туттардылар. Эксээмэннэри туттарыы сүрүн кэмэ бэс ыйын 23 күнүгэр диэри салҕанар.