Блогер, ааптар Полина Миклиугу кытта көрсүһүү буолла

Бүтүн Арассыыйатааҕы «Библиосумерки» аахсыйа чэрчитинэн, «Детская точка кипения» ааҕыы киинигэр Румынияҕа олорор биир дойдулаахпыт, «Сказки о сбывшихся мечтах» оҕо кинигэтин ааптара, блогер Полина Миклиугу кытта көрсүһүү буолла. 

Саха сирин олохтоохторо Полина блогун сөбүлээн ааҕаллар.  Манна омук сиригэр олоруу, үбү-харчыны сатаан туһаныы, оҕону иитии, уо.д.а. тиэмэлэргэ суруйар, бэйэтин олоҕун көрдөрөр. Онон кинини көрсө элбэх ийэлэр оҕолорун илдьэ кэлбиттэр, элбэх ыйытыыларын биэрдилэр, автограф баттаттылар.

Кэрэхсэбиллээҕэ диэн, бибилэтиэкэ иһинэн эдэр блогердары бэлэмниир үөрэх баар эбит, бу устуудьуйа оҕолоро кэлэн, инники эрээккэ кэчигирэһэн олордулар. Кыбыстыбакка-толлубакка, улахан блогеры түһэрдилэр, ыйытыылары биэрдилэр, таарыйа үөрэннилэр, сорохтор ыллаатылар.

«Сказки о сбывшихся мечтах» кинигэҕэ ыра санааҕа дьулуһуу, доҕордоһуу, эр санааланыы туһунан остуоруйалар киирбиттэр. Полина оҕоҕо кыра эрдэҕиттэн сыал туруорунарга, ону ситиһэргэ ыарахаттары туоруурга үөрэтэргэ ыҥырар.