Блогер Хоту сиргэ дьону хайдах олохсутар туһунан толкуйдуур

Биллэр блогер, айанньыт Богдан Булычев быйыл Саха сиригэр иккис сырыыта. Бу иннинэ тохсунньуга Магадаҥҥа ааспыта. Магадан кини төрөөбүт дойдута, бу мантан кини “Хранители Севера” диэн улахан бырайыагын саҕалаабыт.

Бу сырыыга Дьокуускайга тохтоон, бырайыагын туһунан билиһиннэрдэ.

“Үгүс оҕо бэйэтин нэһилиэгин, улууһун, улууһун киинин, киин куоратын эрэ билэр. Оттон ыаллыы сытар улууһу олох билбэтин тэҥэ. Ол оннугар Москваны, Санкт-Петербуру, Сочины, онтон да атын сирдэри кимнээҕэр үчүгэйдик билэр буолар. Ол иһин биһиги сорукпут диэн оҕолорго атын улуустары, оройуоннары көрдөрүү, профориентационнай хайысханан ханнык оройуоҥҥа ханнык бөдөҥ бырамыысыланнай эбийиэктэр баалларын, манна ньиэби хостууллар, манна гааһы хостууллар, манна таас чох разреһа баар диэн кэпсээн, көрдөрөн биэрии. Дьэ, оччоҕо, оҕо ханна туох баарын көрөр-билэр, үөрэҕин бүтэрэн баран онно кэлэн үлэлиэн сөп. Бырайыак “Хранители Севера” диэн аатын толору кэрэһилиэ этэ”.

Богдан быйыл Илиҥҥи экэнэмиичэскэй пуорумҥа Юрий Трутневы, Алексей Чекунковы, Уһук Илин эрэгэйиэннэрин бэрэстэбиитэллэрин көрсөн, бырайыагын Уһук Илин сиригэр-уотугар барытыгар таһаарыан баҕарар.

“Мин Магадан уобалаһыгар төрөөбүтүм, — диир кини. — Улааппытым кэннэ биһиги бөһүөлэкпитин сабан кэбиспиттэрэ. Өскөтө саппатахтара эбитэ буоллар, мин төрөөбүт бөһүөлэкпэр төннөн кэлиэм, үлэлиэм этэ. Дьиҥэр, Хоту сиргэ баар нэһилиэнньэлээх пууннары, онно олохсуйан олорор дьону чөл тутан хаалларыахха наада. Хайа да балаһыанньаҕа баахтанан үлэлиир ньыманы киллэримиэххэ. Биллэн турар, баахтанан үлэлиир ньыма экэнэмиичэскэй өттүнэн эрэгийиэҥҥэ да, дойдуга да барыстаах гынан баран, кинилэр барбыттарын кэннэ сир аатыттан ааспыт сир хаалар. Ол иһин дьон олохсуйарын, улаатан идэ ылбыт оҕолор төрөөбүт дойдуларыгар төннөн кэлэллэрин ситиһиэххэ наада”.

Бырайыак Уһук Илини, Арктиканы эрэ буолбакка, бүтүн дойдуну да хабыан сөп. Киин Арассыыйа оҕолоругар Арктика, Уһук Илин туһунан кэпсээтэтэххэ, баҕар кэлиэн баҕарар оҕо көстөн хаалыа. Кэлии дьон Хоту сири сайыннарбыт, кылааттарын укпут холобурдара элбэхтэр.

Айанньыт бырайыак улаатан иһэригэр, судаарыстыба, эрэгийиэн, биисинэс өттүттэн манна улахан кэлим хардыы оҥоһулларыгар эрэнэр.