Бобуулаах ситимнэргэ угуйук иһин ыстарааптыахтара

Арассыыйаҕа хааччахтаммыт ресурсаларга, ол иһигэр бобуулаах социальнай ситимнэргэ угуйугу  сакаастааһын эбэтэр таһаарыы иһин 500 тыһыынчаҕа тиийэ суумалаах ыстараап балаҕан ыйын 1 күнүттэн олохтонуон сөп.

Чопчу туох бобуулаах буолуоҕай?

Бу сыл балаҕан ыйын 1 күнүттэн федеральнай сокуоҥҥа олоҕуран, экстремистскайынан билиниллибит интэриниэт ресурсаларга, РФ-га бобуулаахтарга  ханнык баҕарар эрэкэлээмэни таһаарыы бобуллуоҕа. Бу ордук  Instagram* уонна Facebook* (Meta* признана экстремисткой организацией, ее деятельность запрещена в России) сыһыаннаах.  Урут таһаарыллыбыт угуйуктар  балаҕан ыйын 1 күнүгэр диэри хаалбыт буоллахтарына, эмиэ быраабы кэһиинэн ааҕыллаллар.

Биирдиилээн дьон, урбаанньыттар, дуоһунастаах дьон, юридическай сирэйдэр 2 тыһыынчаттан саҕалаан, 500 тыһыынча солкуобайга тиийэ ыстарааптаныахтарын сөп. Угуйугу  сакаастааччы уонна таһаарааччы эппиэтинэһи сүгэллэр.

Бобуу көннөрү дьоҥҥо эмиэ сыһыаннаах. Холобур, бэйэҕит поскутугар эбэтэр сторискытыгар ханнык эрэ табаары, өҥөнү эбэтэр бренди сүбэлиир, көрдөрөр да буоллаххытына, угуйук быһыытынан ааҕыллан буруйга тардыллыахха сөп.

Хааччахтаммыт социальнай ситим аккаунугар репост оҥорор,  суруйтарарга ыҥырар, сигэтин ыытар  (ол иһигэр, QR код нөҥүө) буоллаххытына, экстремистскэй тэрилтэ угуйугун курдук сыаналаныан сөп.

Тугу сүбэлииллэрий?

-Балаҕан ыйын 1 күнүгэр диэри бобуулаах ресурсаларга угуйугу  оҥорбут постаргытын суох оҥоруҥ;

-Блогердар уонна 10 тыһыынчаттан тахса сурутааччылаахтар регистрация туһунан сокуон баарын, оттон бобуулаах социальнай ситимнэргэ аккауннар  реестргэ кыттыбаттарын  өйдүөхтээхтэр;

Урукку таһаарыыларгытын хонтуруоллааҥ – өскөтүн аһаҕас буоллахтарына, эмиэ угуйугунан ааҕыллаллар.

*признана экстремисткой организацией, ее деятельность запрещена в России