Бочуоттаах бэтэрээн Татьяна Гуляева 100 сааһын бэлиэтээтэ

Атырдьах ыйын 18 күнүгэр РФ уонна СӨ бочуоттаах бэтэрээнэ, тыыл бэтэрээнэ Татьяна Гуляева 100 саастаах үбүлүөйүн бэлиэтээтэ.

Татьяна Николаевнаны үбүлүөйүнэн өрөспүүбүлүкэ салалтатын аатыттан СӨ  Үлэҕэ уонна социальнай сайдыыга миниистирин бастакы солбуйааччыта Альбина Трубина эҕэрдэлээтэ.

Ытык кырдьаҕаска дойду уонна өрөспүүбүлүкэ салалтатын аатыттан эҕэрдэлэри тиэртэ, ону таһынан СӨ Ил Дархана Айсен Николаев аатыттан «Үйэ саас»  бочуоттаах бэлиэни 1 мөл.сол. төлөбүрүн кытта туттарда.

«Татьяна Николаевна,  100 сааскытын туолар күҥҥүтүнэн чэгиэн доруобуйаны, сылаас сыһыаны ис сүрэхпититтэн баҕарабыт. Биһиги эһигинэн киэн туттабыт уонна өрөспүүбүлүкэбит сайдыытыгар тугунан да сыаналаммат кылааккыт иһин ис сүрэхпититтэн махталбытын тиэрдэбит», – диэн Альбина Трубина бэлиэтээтэ.

Татьяна Николаевна Гуляева 1925 сыллаахха атырдьах ыйын 18 күнүгэр Орто Халыма улууһугар төрөөбүтэ. 1946 сыллаахха институту бүтэрэн, 1948 сылга диэри учууталынан үлэлээбитэ. 1948 сыллаахха Орто Халыматааҕы ЫБСЛКС райкомун сэкирэтээринэн талыллыбыта, оттон 1952 сыллаахха Дьокуускай куоракка ЫБСЛКС обкомугар үлэҕэ көһөрүллүбүтэ, онно хомсомуол Дьокуускайдааҕы обкомун сэкирэтээринэн үлэлээбитэ.

1955 сыллаахха партия Дьокуускайдааҕы обкома кинини ССКП КК иһинэн Үрдүкү партийнай оскуолаҕа үөрэххэ ыыппыта. Ону бүтэрэн 1958 сылтан 1963 сылга диэри партия обкомун инструкторынан, 1963 сылтан 1975 сылга диэри ССКП Дьокуускайдааҕы горкомун тэрийэр-дьаһайар отделын сэбиэдиссэйин солбуйааччытынан үлэлээбитэ. 1975 сыллаахха кини куораттааҕы Сэбиэт дьокутаатынан талыллыбыта уонна Үлэһиттэр дьокутааттарын Дьокуускай куораттааҕы Сэбиэтин исполкомун аппараатын салайааччытынан анаммыта.

1982 сыллаахха бу исполком социальнай хааччыйыытын отделын сэбиэдиссэйинэн анаммыта уонна 8 сыл устата Социальнай хааччыйыы министиэристибэтин кэллиэгийэтин чилиэнинэн буолбута. 1988 сыллаахха бочуоттаах сынньалаҥҥа олорон, куораттааҕы Бэтэрээннэр сэбиэттэригэр үлэлээбитэ уонна Сэбиэт президиумун чилиэнинэн буолбута. Татьяна Николаевна САССР Үрдүкү Сэбиэтин Президиумун Бочуотунай кырааматалардаах, «Дьокуускай куоракка өҥөлөрүн иһин», «Гражданскай килбиэн» бочуоттаах бэлиэлэрдээх, «СӨ норуотун хаһаайыстыбатын үтүөлээх үлэһитэ», «СӨ Бочуоттаах ытык кырдьаҕаһа», «РФ Бочуоттаах бэтэрээнэ», «СӨ Бочуоттаах бэтэрээнэ» бэлиээрдээх, Саха Өрөспүүбүлүкэтин Бырабыыталыстыбатын, Саха Өрөспүүбүлүкэтин Ил Түмэнин, Дьокуускай куораттааҕы Дуума кырааматаларынан наҕараадаламмыта.