Бочуоттаах дириэктэр аатын — бибилэтиэкэ бэриниилээх үлэһитигэр

Уус Алдан улууһун киинигэр Бороҕоҥҥо В.В.Никифоров-Күлүмнүүр аатынан култуура дыбарыаһыгар тэрээһин буолла.

Бу СӨ култууратын үтүөлээх үлэһитэ, РФ култууратын сайдыытыгар кылаатын иһин бэлиэ хаһаайына, СӨ култууратын уонна искусствотын Бочуоттаах үлэһитэ, Уус Алдан улууһун Бочуоттаах олохтооҕо, өр сыллар усталарыгар улуустааҕы кииннэммит бибилэтиэкэ тиһигин сатабыллаахтык салайбыт В.Н.Окоемованы бочуоттаах сынньалаҥҥа атаарар долгутуулаах тэрээһиҥҥэ сааланы толору киһи муһунна.

Уус Алдан улууһун салайааччылара, Варвара Николаевна үлэ үөһүгэр бииргэ алтыспыт дьоно, улуус бибилэтиэкэлэрэ олох сайдыытын чэрчитинэн инники хардыылыылларыгар, материальнай баазалара күнтэн күн тупсан иһэригэр, пуондалара хаҥыырыгар, кэлэктиип биир сомоҕо буолан үрдүк ситиһиилэнэригэр сүҥкэн кылааты киллэрбит, улууска бастыҥнар кэккэлэригэр сылдьар, өрөспүүбүлүкэ библиотечнай эйгэтэ билинэр улахан салайааччыта буоларын киэн туттан бэлиэтээтилэр. Ону сэргэ, Варвара Николаевна улуус социальнай-экэнэмиичэскэй, кутуурунай сайдыытыгар, уопсастыбаннай олоҕор киллэрбит кылаатын, үтүө-мааны майгытын, үлэһиттэригэр, бар дьонугар истиҥ сыһыанын үрдүктүк сыаналаан махталларын эттилэр,

Уус Алданнааҕы кииннэммит бибилэтиэкэ тиһигин Бочуоттаах дириэктэрэ диэн ааты В.Н.Окоемоваҕа аныыр туһунан Уус Алдан улууһун баһылыга В.И.Аммосов үөрүүлээх быһыыга-майгыга  туттарда.

Раиса Черкашина,

Суотту, Уус Алдан.

Евдокия Окоемова хаартыскаларга түһэриитэ.