Хаартыска: "Хаҥалас" хаһыат саайтыттан
Хаҥалас улууһун олохтоохторо байыаннай дьайыы саҕаланыаҕыттан биир дойдулаахтарыгар араас көмөнү оҥороллор. Нэһилиэктэргэ ордук дьахталлар, эбээлэр түмсүүлэрэ араас аахсыйаларга кыттыһан таҥас-сап, наадалаах тэрил тигэн ыыталлар. Бу туһунан «Хаҥалас» хаһыат иһитиннэрэр.
Оттон Булгунньахтаах олохтоохторо атырдьах ыйын бүтүүтэ «Боевые шелкопряды Якутии» общественнай хамсааһыҥҥа кыттыһан харысхал сеткалары, нашлемниктары өрөр буолбуттара. Бу хамсааһыҥҥа хаһан-хайдах кыттыһан саҕалаабытын уонна биир дойдулаахтарын көҕүлээбитин туһунан Людмила Уварова кэпсээтэ.
— Мин олунньу ыйга Дьокуускайга баар «Боевые шелкопряды Якутии» волонтердар хамсааһыннарыгар кыттыспытым, онно сылдьан байыаннайдар олус наадыйар харысхал сеткаларын баайарга, өрөргө үөрэммитим. Сайын дойдубар Булгунньахтаахха тахсан бараммын атын улуустар, куораттар маннык сетканы баайан биир дойдулаахтарыгар көмөлөһөллөрүн көрөммүн байыаннай дьайыыга сылдьар бэйэбит уолаттарбытыгар эмиэ харысхал сетка баайыаҕыҥ диэн ыҥырыы ыыппытым, WhatsApp-ка бөлөх арыйбытым. Биир дойдулаахтарым ыҥырыыны ылынан, уоппускаҕа олорооччулар, биэнсийэлээхтэр кыттыһаннар, бэрт элбэх буолан олохтоох Култуура киинигэр мустан сеткаларбытын өрөн саҕалаабыппыт. Билигин үгүспүт үлэлэригэр тахсаннар быыс-арыт буллахтарына эрэ кэлэллэр, сорох биэнсийэлээхтэрбит куоракка кыстыы бардылар, ол да буоллар, аҕыйаатыбыт диэбэккэ, үлэбитин ыыта сылдьабыт, — диир төһө да биэнсийэҕэ олордор бары саҕалааһыннарга көхтөөх Людмила Ивановна.
— Сетканы баайыы уустук дуо? Матырыйаалы хантан ылаҕытый?
— Харысхал сетканы оҥоруу, үөрэннэххэ, улахан уустуга суох. Бастаан биһиэхэ олохтоох столярнай сыах үлэһитэ Иван Анастатов икки араама оҥорон биэрбитэ. Матырыйаалбытын Дьокуускайтан аҕалабыт, онно өрөспүүбүлүкэтээҕи түмсүүлэр харчы хомуйан, тэрилтэлэр, спонсордар көмөлөрүнэн Санкт Петербург, Владивосток куораттартан сакаастаан аҕалтараллар уонна филиалларынан түҥэтэллэр. Сетка кээмэйэ араамабытыттан тутулуктаах, биһиэнэ 2х2,20 м, икки хос буолар. Маннык сетканы саллааттар тус бэйэлэрэ туттуохтарын сөп эбэтэр хаһы да холбуу баайан блендаж, тиэхиньикэ сабыыта оҥостоллор. Соторутааҕыта, Музыкальнай оскуола үлэһиттэрэ кэлэннэр биир сетканы күнүнэн өрөн бүтэрбиттэрэ, аҕыйах буоллахпытына биир сетканы 2-3 күн устата оҥоробут.
— Уопсайа хас сетканы бэлэмнээтигит? Көмөҕүтүн ханна ыыттыгыт?
— Булгунньахтаахтар уопсайа 15 сетканы баайдыбыт. Сеткаттан ураты өссө нашлемник диэн каска үрдүнэн кэтиллэр харысхалы өрөбүт. Нашлемник кыра харахтаах сеткаттан оҥоһуллар, билигин матырыйаалбыт бүтэн тохтоотубут. Улахан Аан биэнсийэлээхтэрэ кэлэн биһиэхэ көмөлөһөн нашлемник оҥорустулар, ону сетканы кытта холбоон 5 кэмпилиэк бэлэмнээн, анал логотиптаах мөһөөччүктээн 2-с Малдьаҕар нэһилиэгин баһылыгар туттардыбыт.
Онтон сороҕун өрөспүүбүлүкэтээҕи ыстаапка туттарбыппыт, сороҕун мантан барааччы уолаттарбытыгар биэрэн ыыппыппыт. Бэлиэтээн эттэххэ, билигин нэһилиэкпититтэн 13 ыччаппыт байыаннай дьайыыга кытта сылдьар. Кинилэргэ ыраахтан да буоллар күүс, өйөбүл-тирэх буолаары бу курдук кыралаан көмөлөһөбүт, — диэн Людмила Уварова түмүктээтэ.
Амарах санаалаахтарга, үтүө сүрэхтээхтэргэ бу курдук бэриниилээх үлэҕит иһин махтал!
Ольга Гермогенова.
Өрөспүүбүлүкэтээҕи "Оһуокай" түмсүү Дархан этээччитэ Лариса Николаевна оскуола үөрэнэччилэрин дьарыктаабыта ыраатта. Туйах хатарааччылаах бастыҥ этээччибит…
Айсен Николаев Олоҥхо тыйаатырын Саха сирин норуоттарын култуурунай баайын эбийиэгинэн билинэр туһунан Ыйаахха илии баттаата.…
Дьокуускайга 4 №-дээх полиция отделын дьуһуурунай чааһыгар дьахтар суумкатын уордарбытын туһунан сайабылыанньа суруйбут. Кини киин…
Алааска, тыаҕа сылдьан хаһыытыыры, улаханнык айдаарары боболлорун билэргит буолуо. Ону таһынан өссө тугу сэрэтэллэрий, өйдөтөллөрүй?…
Айсен Николаев Судаарыстыбаннай Мунньахха (Ил Түмэҥҥэ) туһаайан этиитигэр дьиэ кэргэннээх үлэһиттэри өйүүр миэрэлэри олоххо киллэрэргэ…
Үгүс үбүлүөйдээх тэрээһиннэринэн баай Өлүөхүмэ улууһун 1-Нөөрүктээйитээҕи модельнай бибилэтиэкэҕэ, ааспыт нэдиэлэҕэ сылы түмүктүүр тэрээһин буолан…