«Бойобуой доҕордоһуу чаҕылхай туоһулара…» кинигэ сүрэхтэннэ

Бэҕэһээ, кулун тутар 6 күнүгэр, Дьокуускайга «Аҕа дойдуну көмүскээччилэр» судаарыстыбаннай пуонда  филиалын дьиэтигэр «Бойобуой доҕордоһуу чаҕылхай туоһулара…» кинигэ сүрэхтэниитэ буолла.

Кинигэни Сунтаар улууһун Уһун Күөл бөһүөлэгин олохтооҕо, суруйар идэнэн умсугуйан дьарыктанар Эдуард Еремеев суруйан таһаарда. «Офсет» кинигэ кыһатыгар 1000 ахсаанынан бэчээттэнэн күн сирин көрдө. Тэрээһиҥҥэ Сунтаар, Нам уонна Чурапчы улууһун салалталара, уолаттарбыт дьиэ кэргэттэрэ, чугас аймахтара уонна коллегалара муһуннулар.

«Аҕа дойдуну көмүскээччилэр»  пуонда  Саха сиринээҕи салаатын салайааччыта Алексей Александров анал байыаннай дьайыыга сыһыаннаах, дьиҥ чахчыны кэпсиир кинигэ тахсара билиҥҥи кэмҥэ олус тоҕоостооҕун ыйда.  Саха сирин Ытык сүбэтин  бэрэссэдээтэлин  солбуйааччы Аркадий Саввинов, Ил Түмэн депутата Афанасий Постников, Нам улууһун баһылыга Юрий Слепцов, Чурапчы улууһун баһылыгын солбуйааччы Алексей Лобанов, Аҕа дойду көмүскээччилэрин дьиэ кэргэттэрин эрэгийиэннээҕи  сойууһун салайааччыта Светлана Диодорова-Лаврентьева, Уһун Күөл нэһилиэгин баһылыга Иван Игнатьев, Мырыла нэһилиэгин баһылыга Виктор Собакин, Намнааҕы кииннэммит библиотечнай ситим директора Майя Софронова, Арассыыйа Дьоруойа Дмитрий Егоров аҕата Николай Егоров, Николай Романов кэргэнэ Нюргуяна Романова кинигэ тахсыбытынан автор Эдуард Даниловичка махталларын эттилэр уонна бары бэйэлэрин санааларын, икки уолаттар тустарынан олус истиҥ ахтыы оҥордулар.

Тыл этээччилэр бу сүҥкэн үлэ нууччалыы тылбаастанан бүтүн дойду үрдүнэн тарҕанан үүнэр ыччакка үтүө холобур буоларын бигэргэттилэр. Саха уолаттара олохторун тиһэх күннэригэр диэри бэйэ-бэйэни өйөһүү, бэйэ-бэйэҕэ көмөлөсүһүү, андаҕары чиэстээхтик толоруу курдук олох үтүө хаачыстыбаларын тыыннаахтыы көрдөрбүт  дьоруойдар буолаллар. Маннык туйгун холобуру оскуола саҕаттан оҕолорго үөрэтэн, иитэн, кэпсээн оҥостуохтаахпытын тоһоҕолоон эттилэр.

Кинигэ ааптара  Эдуард Еремеев бэйэтин санаатын маннык үллэстэр:

— Кинигэ анал байыаннай дьайыыга саха омук боотурдарын бойобуой доҕордоһууларын көрдөрөр киэҥ ис хоһоонноох документальнай прозаҕа кубулуйда. Сүрүн дьоруойдар – Арассыыйа  уонна Донецкай норуодунай  өрөспүүбүлүкэ дьоруойа  Дмитрий Егоров «Сунтаар» уонна «Эр санаа» уордьан кавалера Николай Романов «Ронин». Кинилэр бииргэ сылдьыбыт хамандыырдарын, дойдубут араас  эрэгийиэннэриттэн сылдьыспыт уолаттарын тыыннаах кэпсээннэринэн баар чахчыларга олоҕуран сурулунна. Анал байыаннай дьайыыга сыһыаннарын, көрүүлэрин, ыра санааларын, хас биирдии хорсун быһыыларын ойуулаан-дьүһүннээн көрдөрө сатаатым. Бу сүҥкэн үлэ суруллуутугар төрөөбүт улууһум баһылыга Анатолий Григорьев, үөрэх салалтата, олох-дьаһах хаһаайыстыбатын Сунтаардааҕы филиала, техколледж, улуустааҕы уонна олохтоох библиотека, олохтоох дьаһалта көмөлөстүлэр. Кинигэттэн киирбит үп бу суруллубут геройдарбыт тулаайах хаалбыт оҕолоругар ананыаҕа. Кинигэнэн эрэ муҥурданыам дуо диэн, матырыйаалбын сценарийга кубулутан киинэҕэ киирсэн көрбүт киһи диэн баҕа санаабын өйөөччүлэр соһуччу көстөннөр, аны уолаттарбытын үйэтитэр үлэ атын көрүҥүнэн салҕанан эрэриттэн үөрдүм.

Улуус дьаһалтатыгар үлэлээбит, Нам улууһун социальнай-экономическай сайдыытыгар кылаатын киллэрбит Николай Романов аата  Арассыыйа Дьоруойа Дмитрий Егоровы кытта тэҥҥэ үйэтитиллэн кинигэҕэ киирдэ. Бу кинигэ өссө киинэ дуу, испэктээк дуу буолан таҕыстаҕына уолаттарбыт ааттара үйэлэргэ ааттана туруоҕа.

«Нам улууһа» МО пресс-сулууспата