Боксер Василий Егоров аан дойду чөмпүйэнээтигэр бастакы киирсиитигэр кыайда

Бүгүн, ыам ыйын 4 күнүгэр, Василий Егоров Узбекистаҥҥа ыытыллар буоксаҕа эр дьоҥҥо аан дойду чөмпүйэнээтигэр бастакы киирсиитигэр кыайда. Саха боксера Турцияттан сылдьар Гюмюш Саметы кытта күөн көрүстэ.

Василий Егоров салгыы аны Японияттан сылдьар 2019 сыллаахха аан дойду чөмпүйүөнэ буолбут боксеру кытта күрэхтэһиэҕэ. Биһиги боксербут бу күрэхтэһиигэ 51 киилэҕэ диэри ыйааһыҥҥа кыттар.

Санатан суруйдахха, аан дойду чөмпүйэнээтэ муус устар 30 күнүттэн ыам ыйын 14 күнүгэр диэри ыытыллар. Василий Егоров Арассыыйа сүүмэрдэммит хамаандатын састаабыгар дойду билиҥҥи чөмпүйүөнэ быһыытынан киирбитэ.

Чөмпүйэнээт рингэтигэр барыта 13 кэмпилиэк мэтээл оонньонуоҕа. Тэрийээччилэр иһитиннэрбиттэринэн, күрэхтэһии бириистээх пуондата — 5,2 мөл. дуоллар.