Боксер Василий Егоров «IBA чөмпүйүөннэрин түүнэ» турнирга кыттыаҕа

Саха боксера Василий Егоров боксаҕа WBA Continental турнир чөмпүйүөн аатын иһин киирсиэҕэ.

Күрэхтэһии Уфаҕа алтынньы 17 күнүгэр «IBA чөмпүйүөннэрин түүнэ» турнир чэрчитинэн ыытыллар. Билигин спортсмен Сочига турнирга бэлэмнэнэр. Бастаан утаа Василий Егоров утарсааччытынан филиппинец, аан дойду вице-чөмпүйүөнэ, Европа икки төгүллээх чөмпүйүөнэ Берланд Робес киирсиэхтээх этэ. Ол эрээри утарылаһааччыны уларытыы буолла.

Ол курдук, саха боксерын утары Намбияттан төрүттээх Иммануэль Йозеф киирсиэҕэ. Кини рингэҕэ аан бастакытын 2014 сылаахха тахсыбыта.  Бу спортсмен 20 ыытыллыбыт киирсиилэртэн 15 төгүл кыайыылааҕынан тахсыбыта биллэр. Бокс киэһэтин алтынньы 17 күнүгэр «Матч ТВ» ханаалга быһа эпииргэ көрдөрүөхтэрэ. Бу туһунан «Триумф» успуорт уораҕайын пресс-сулууспата суруйар.