Боксер Василий Егоров спортивнай карьератын кыайыынан түмүктээтэ

Боксер Василий Егоров «Вызов Севера» күрэхтэһиигэ кыайыытынан спортивнай карьератын түмүктээтэ. Кини бу туһунан бэйэтин тус телеграм-ханаалыгар эрдэ иһитиннэрбитэ.

Бэҕэһээ, ахсынньы 14 күнүгэр, Дьокуускайга «Вызов Севера» күрэхтэһии ыытылынна. Онно буоксаҕа Арассыыйа успуордун үтүөлээх маастара, Арассыыйа биэс төгүллээх, Европа икки төгүллээх чөмпүйүөнэ, аан дойду призера, олимпийскай оонньуулар кыттыылааҕа Василий Егоров Филиппиныттан кэлбит Джевен Вилласит диэн боксеру итэҕэтиилээх кыайан, спортивнай карьератын түмүктээтэ.

«Уолбутугар Василийга буокса көрүҥэ сайдыытыгар улахан кылаатыҥ, аан дойду таһымыгар Сахабыт сирин, норуоккун, дойдубут аатын дорҕоонноохтук ааттаппыккар биир дойдулаахтарыҥ, Мэҥэ Хаҥалаһыҥ үлэһит дьонун уонна тус бэйэм ааппыттан улахан махталбытын тиэрдэбин! Эйиэхэ тус олоххор, дьиэ кэргэҥҥэр чэгиэн буолууну, үрдүк ситиһиилэри, дьолу баҕарабын! Аартыктарыҥ арыллан, кэҥээн истиннэр, төрөөбүт дойдуҥ аатын өрүү өрө тутан, кыайыы, ситиһии аргыстаах буол!» — диэн Мэҥэ Хаҥалас улууһун баһылыга Дмитрий Тихонов телеграм-ханаалыгар суруйда.