Бокуруоп күн сорох улуустарга -22 кыраадыска тиийэ тымныйыа

Сылаас күннэрбит бүттүлэр. Аны мантан ыла тымныйан, кыһыммыт тыына биллэн барыаҕа.

Күнү-дьылы кэтээн көрөр сулууспа иһитиннэрэринэн, сарсын, алтынньы 13 күнүгэр өрөспүүбүлүкэ илин, күнүһүн соҕуруулуу-арҕаа, соҕуруу өттүнэн кыралаан, сорох сирдэринэн сөбүгэр хаар түһүөҕэ. Түүнүн Уус Маайа, Томпо, Өймөкөөн улуустарыгар, күнүһүн Нерюнгри оройуонугар миэстэтинэн хаар хойуутук түһүөҕэ.

Сөбүгэр тыалырыа, сорох сирдэринэн 9-14 миэтэрэҕэ диэри күүһүрүө, Нерюнгри оройуонугар күнүс 15-18 миэтэрэҕэ тиийиэ.

Түүнүн -5-10°, былыта суох күн -11-16°, хотугулуу-арҕаа -18-23° кыраадыс тымныы буолуоҕа. Күнүһүн 0,-5°, соҕуруу уонна Халымаҕа +3° диэри сылыйыа, хотугулуу-арҕаа, Арктика кытылынан -5-10° буолуо.

Алтынньы 14 күнүгэр Саха сирин баһыйар үгүс өттүгэр кыралаан хаардыа. Хотугулуу-илин, соҕуруулуу-илин, соҕуруулуу-арҕаа сөбүгэр, соҕуруулуу-арҕаа сорох сирдэринэн хойуутук түһүөҕэ. Тыал хотугулуу-илин, соҕуруу, соҕуруулуу-арҕаа, өрүс кытылынан сөкүүндэҕэ 9-14 миэтэрэлээх, сорох сирдэринэн тибии тибиэ.

Түүнүн -5-10°, хаар түһэр кэмигэр -2-7°, хоту -17-22°, күнүһүн -2-7°, соҕуруулуу-илин, Халыма улуустарынан +2°, хоту -10-15° кыраадыс буолуо.