Болҕойуҥ! Маай бырааһынньыктарыгар ГАИ үлэтин күүһүртүлэр

Госавтоинспекция сулууспата Маай бырааһынньыктарын өрөбүллэригэр күүстэх үлэ эрэсиимигэр көстө.

Суол быраабылатын куруубайдык кэһиини туоратыыга ураты болҕомто ууруллуоҕа. Ол курдук, ыам ыйын 1-10 күннэригэр Саха сирин суолларыгар ДПС үлэһиттэрэ эбиллиэхтэрэ, нэһилиэнньэлээх пууннарга киирэр-тахсар сирдэригэр ГАИ үлэһиттэрэ дьуһуурустубалыахтара, суол быраабылатын араас кэһиилэрин сэрэтиигэ маассабай бэрэбиэркэлээһиннэри ыытыахтара.

Ордук болҕомтону көҥүлэ суох уруулга олорбут суоппардарга, итирик туруктаахтарга, пассажирдары таһыыга, ол иһигэр сокуоннай саастарын ситэ илик оҕолору таһыыга ууруллуоҕа. Ону сэргэ матасыыкыл суоппардарыгар сэрэтии үлэтэ күүһүрүөҕэ. «Өлүөнэ», «Халыма», «Бүлүү» федеральнай суолларга көһө сылдьар постар салгыы үлэлиэхтэрэ.