Болҕомто киинигэр — патриотизм уонна байыаннай дьайыы тиэмэтигэр уруһуйдар

Дьокуускайга  байыаннай дьайыы уонна дойдуга бэриниилээх буолуу тиэмэтигэр хас да муралы уонна уруһуйдары көрдөрдүлэр.

Дьокуускайга 16 №-дээх оскуолаҕа  СӨ ИДьМ ОМОН хамандыыра, ДОСААФ эрэгийиэннээҕи отделениетын бэрэссэдээтэлэ Сергей Черных аатын үйэтитэр соруктаах  тэрээһин буолла.

«Бу СӨ ИДьМ ОМОН хамандыыра, ДОСААФ эрэгийиэннээҕи отделениетын бэрэссэдээтэлэ Сергей Черныхха анаммыт мурал кини аатын сүгэр оскуолаҕа баар буолла. Ийэ дойдуну көмүскээччилэр — Аҕа дойду Улуу сэриитин кыттыылаахтарын уонна бойобуой дьайыылар бэтэрээннэрин, дьоруойдар тустарынан үйэтитии, бу биһиги үлэбит биир сүрүн хайысхата«, — диэн этэр СӨ Ыччат дьыалаларыгар уонна социальнай коммуникацияларпга миниистир Петр Шамаев.

Хотугу Кавказ эрэгийиэнигэр сулууспалыы сылдьан, милииссийэ полковнига, бойобуой дьайыылар бэтэрээннэрэ Сергей Черных хорсун-хоодуот быһыыны оҥорон «Хорсун быһыы» уордьанынан, «Аҕа дойду иннигэр үтүөтүн иһин» уордьан мэтээлинэн, «За отличие в службе», «За отличие в охране общественного порядка» мэтээллэринэн, РФ Бэрэсидьиэнэ В.Путин Махтал суругунан, уо.д.а. наҕараадаламмыта.

Дириэктэри солбуйааччы Елизавета Дубовская 16 №-дээх оскуола 2020  сылтан байыас аатын сүгэрин этэр. «Биһиги оскуолабытыгар Арассыыйа патриота Сергей Георгиевич Черных аатын үйэтитэр мурал баар буолбутуттан үөрэбит. Кини үүнэр көлүөнэни иитиигэ элбэх сыратын уурбута«, — диэн бэлиэтиир.

Маны сэргэ, бу күн 21 №-дээх оскуолаҕа «Алеша» номоххо киирбит тааҥка экипаһыгар анаммыт муралы астылар. Тааҥка экипаһыгар Арассыыйа Дьоруойдара — Саха сирин икки байыаһа — ефрейтор Алексей Неустроев уонна мэхээнньик Филипп Евсеев бааллар.

ХИФУ байыаннай үөрэтэр киинигэр Аҕа дойду сэриитигэр Сэбиэскэй Сойуус Улуу Кыайыытын бэлиэтинэн буолбут — рейхстаг үрдүгэр кытара кыыспыт Кыайыы Знамятыгар анаммыт дьүһүйүү баар буолла.

Дьокуускайдааҕы мэдиссиинэ кэллиэһигэр мурал Сэбиэскэй Сойуус Дьоруойугар, 369-c муора пехотатын батальонун санинструкторыгар Екатерина Деминаҕа анаммыт. Кини Темрюктааҕы десантнай эпэрээссийэҕэ, контузияланан да баран, бааһырбыт 17 байыаска көмөнү оҥорбут, о.д.а. хорсун-хоодуот быһыылара сөхтөрөллөр.

Петр Шамаев патриотическай тиэмэҕэ саҥа мураллары оҥоруу кэлэр сылга салҕаныаҕын туһунан эттэ.

СӨ Ил Дарханын уонна Бырабыыталыстыбатын пресс-сулууспата

Хаартыска СИА