Болҕомтону тардар бибилэтиэкэ

Горнайга Атамай олохтоох бибилэтиэкэтин үлэтэ болҕомтону тардар. 

Быйыл Улуу Кыайыы 80 сылыгар аналлаах араас тэрээһиннэри уһуйаан, оскуола кэлэктиибигэр, оҕолорго, ыччаттарга, аҕам саастаахтарга тиһиктээхтик тэрийэн ыыттылар. Тэрээһиннэр салҕаналлар.

Улуу Кыайыы 80 сылыгар анаммыт «Ким да умнуллубат, туох да умнуллубат» көрсүһүүлэр, сэһэргэһиилэр олус интэриэһинэйдик ыытылыннылар. «Биһиги дьоруойдарбыт», » Хорсун буолуу»,  «Өрүү холобур буолуо» уо.д.а. дьон көхтөөхтүк кытынна. Ону тэҥэ, хоһоон ааҕыытыгар күрэстэр, «Сааскы таммах», » Литературнай бумер», «Кыайыы диктана», ыччаттарга аналлаах «Брейн-ринг», квест-оонньуулар уо.д.а. сүргэни көтөхтүлэр, сэргэхсийиини таһаардылар. Бибилэтиэкэ иһинэн тэриллибит «Төлөн» түмсүү кыттыылаахтара бэйэлэрэ айан суруйбут иэйиилээх хоһооннорун ааҕан, дьон-сэргэ сөҕүүтүн, хайҕалын ыллылар. Нэһилиэкпит ааҕар балаҕанын сэбиэдиссэйэ Елизавета Ефремова хас биирдии киһиэхэ болҕомтотун ууран, олус сэргэх, ураты тэрээһиннэри, көрсүһүүлэри тэрийэн олохтоохтор махталларын ылар.

Биһиги бибилэтиэкэбитигэр бу курдук тэрээһиннэр өссө да ыытылла, ааҕааччылара элбии туруохтарын баҕарабыт.

Валентина Яковлева,

Атамай, Горнай

Елизавета Ефремова хаартыскаларга түһэриитэ