Болҕомтону тардыбыт LETO YAKUTIA үлэтэ сайдар, кэҥиир!
![](https://sakha-sire.ru/wp-content/uploads/2024/02/obshhaya-veselaya-1-1000x596.jpg)
Бүгүн, олунньу 1 күнүгэр, болҕомтону тардыбыт LETO YAKUTIA компетенция киинэ тэриллибитэ биэс сылын туолла.
«Куорат табыгастаах эйгэтин тэрийии» бырагыраама баар буолуоҕуттан, дойдуга эрэгийиэннээҕи компетенция кииннэрин тэрийии наада буолбут. LETO YAKUTIA компетенция киинэ СӨ Үүнэр көлүөнэ тус сыаллаах пуондатын структуратыгар тэриллибит.
LETO куорат эйгэтин тупсарыыга кыттааччылары түмэр, санааны атастаһар былаһаакканан буолар диэн бигэргэтэллэр. Куораттары бигэтик сайыннарыыга хайысхалаах «Куорат табыгастаах эйгэтин тэрийии» бырагырааманы олоххо киллэриини Саха сиригэр бу киин сүрүннүүр. Үлэ биир стратегическай хайысхатынан Саха сирин куораттарын уонна сэлиэнньэлэрин маастар-былааннарын оҥоруу буолбут. Манна даҕатан эттэххэ, национальнай бырайыагы олоххо киллэрии көдьүүстээҕин көрдөр6н, дойду бэрэсидьиэнэ бырагырааманы 2030 сылга диэри уһатары иһитиннэрбит.
Манна да5атан эттэххэ, Саха сиригэр биэс сылга уопсайа 379 уопсастыбаннай эйгэ, дьоҕус-паарка, » Куорат табыгастаах эйгэтин тэрийии» уонна «Уһук Илин 1000 тиэргэн» бырайыактарынан тупсарыллыбыт. Бүтүн Арассыыйатааҕы бастыҥ бырайыактар куонкурустарыгар кыайыылар түмүктэринэн, өрөспүүбүлүкэҕэ саҥа пааркалар, болуоссаттар, сынньалаҥ сирдэрэ болҕомтону тардар, сүргэни көтөҕөр ураты көрүҥнэнэллэр, аныгы үйэ ирдэбилигэр эппиэттиир гына оҥоһуллаллар, тупсарыллаллар. Быйылгы сылга Мииринэйгэ, Нерюнгригэ, Ленскэйгэ, Орто Халымаҕа, Бүлүүгэ, Үөһээ Бүлүү сэлиэнньэтигэр, Бороҕоҥҥо, Бэрдьигэстээххэ, Майаҕа уонна Жатайга 10 кыайыылаах бырайыагынан тупсаран оҥоруу үлэтэ ыытыллыахтаах.
Киин уопсастыбаннай эйгэни тупсаран олоххо киллэрэригэр, манна дьон-сэргэ чахчы тардыһар сирэ-уота буолуохтаах диэн болҕомтотун уурарын туһунан иһитиннэриигэ этиллэр. Бу сыалы-соругу быһаарар туһуттан компетенция киинэ LETO YAKUTIA диэн бэрт ураты, сэргэх бэстибээли өрөспүүбүлүкэ куораттарыгар уонна сэлиэнньэлэригэр тэрийэр буолбут. Бэстибээл биһирэбили ылбыт. «Биһиги бэстибээлбит — бу аныгы ускуустуба көмөтүнэн эйгэни уларытыы уонна тупсарыы», — диэн этэллэр. Көстөрүн курдук, бу уопсастыбаннай эйгэни үчүгэй өртүгэр уларытыыга, куораттарга уонна сэлиэнньэлэргэ айымньылаах уопсастыбалары көҕүлээһин буолар.
Биэс сыл иһигэр элбэх тэрээһин ыытыллыбыта бэлиэтэнэр. Ол курдук, ICEMAN FEST бэстибээл, UhuktUU муус устар күнэ, LETO Дьокуускайга Таалай күөлгэ, «Эйгэ» архитектура бэстибээлэ. 2022 сыллаахха Ил Дархан иһинэн архитектураҕа уонна куораты тутууга управлениетын кытта бииргэ көмөлөөн «Эйгэ»архитектура уонна дизайн эйгэтигэр өрөспүүбүлүкэээҕи бастакы бириэмийэни туттарыы тэрээһинэ киэҥ далааһыннаахтык ыытыллыбыта. Болҕомтону тардыбыт «Эйгэ» бириэмийэни быйыл туттарыы былааннанар. Манна номинаннар тупсаран оҥоруу үлэтигэр уонна хапытаалынай тутууга саамай бастыҥ үлэлэрин билиһиннэриэхтэрэ.
Компетенция киинин үлэтин сүрүн түмүгэ — архитектордар статустарын үрдэтии, куораттарга уонна сэлиэнньэлэргэ хаачыстыбалаах эйгэҕэ ирдэбил үөскээтэ, архитектурнай- бырайыактыыр быһаарыылар хаачыстыбалара үрдээтэ, олохтоохтор, баһылыктар уонна кинилэр хамаандаларын ирдэбиллэрэ эмиэ үрдээтэ диэн бэлиэтииллэр.
Хаартыска «LETO» компетенция кииниттэн
Сообщить об опечатке
Текст, который будет отправлен нашим редакторам: