«Большой Дальневосточный квест» куонкурус финалистара быһаарылыннылар

«Большой Дальневосточный квест» куонкурус быйыл «Дни регионов Дальнего Востока в Москве – 2024» бэстибээл чэрчитинэн ыытыллар. Куонкуруска 27 финалист быһаарылынна.

Күрэхтэһии бүтэһик иккис түһүмэҕэр кыттааччылар куонкурус сүрүн бирииһин иһин киирсиэхтэрэ — Уһук Илин эрэгийиэннэринэн, ол иһигэр Саха сиригэр икки киһиэхэ путевка оонньонор. Күрэхтэһии бастакы түһүмэҕэр кыттааччылар араас тургутууну ааспыттара, Уһук Илин туһунан билиилэрин бэрэбиэркэлээбиттэрэ. Түмүгэр саамай элбэх баалы ылбыт 27 кыттааччы быһаарылынна.

Финалистары сэрэбиэй кэнниттэн  эрэгийиэннэринэн тарҕаттылар, кинилэр иккис түһүмэххэ  путевка иһин киирсиэхтэрэ. Кинилэри айар эйгэҕэ эбии сорудахтар күүтэллэр. Ол курдук, куонкурус кыайыылаахтарын Саха сиригэр киин куораты кытта билиһиннэриэхтэрэ. Кыайыылаахтары «Үс Кут» этнографическай комплекска уонна «Булууска» сырытыннарар экскурсия бырагыраамата күүтэр. Ону тэҥэ кыттааччылар Өлүөнэ очуостарын көрүөхтэрэ.

«Большой Дальневосточный квест» тоҕус кыайыылаахтарын ааттара бу сыл ахсынньы 2 күнүгэр быһаарыллыаҕа. Атын 18 финалистар анал бириистэри, оттон саамай элбэх баалы ылбыт 100 кыттааччы финалистар бириистэрин ылыахтара. Финалистар испииһэгин кытта «ВКонтакте» страницаҕа киирэн билсиэххэ сөп.

Санатан эттэххэ, «Дни регионов Дальнего Востока в Москве – 2024»  бырайыагы РФ Бэрэсидьиэнин Уһук Илиҥҥэ боломуочуйалаах бэрэстэбиитэлин аппараата, Уһук Илин уонна Арктика сайдыытын корпорацията уонна «Социальнай көҕүлээһиннэри сайыннарыы пуондата»  тэрилтэ өйөөтө. Бырагырааманы кытта сиһилии саайтка киирэн билсиэххэ сөп.