Болтоҥолор граннары кыайа туталлар

Чурапчы улууһун Болтоҥо нэһилиэгин “Утум” социальнай коммерческайа суох тэрилтэтэ уонна Н.Д. Субуруускай аатынан Болтоҥо орто оскуолата «Экодуховное пространство «Үс кут» диэн бырайыагы суруйан, Арассыыйа Бэрэсидьиэнин гранын 2025 сылга  ылбыттара.

Бу бырайыак олугунан атомнай бырамыысыланнас бэтэрээнэ Иоган Егорович Максимов “Экодуховность” диэн үөрэҕэ уонна педагогическай билим доктора Иосиф Семенович Портнягин “Кут-Сүр” этнопедагогикаҕа үлэтэ буолаллар.
Бырайыак сыала: саха норуотун “Үс күт” философиятын нөҥүө, оҕолору, ыччаты иитии-үөрэтии.
“Салгын кут”- айти өттүнэн үөрэх.
“Буор кут “– доруобуйа, успуорт эйгэтэ.
“Ийэ кут”- үйэлэртэн кэлбит үгэстэри үөрэтэр куруһуоктар.
Оскуола иһинэн «Өбүгэ оонньуулара”, Эко-сүүрүүлэр, араас экскурсиялар, Болтоҥо нэһилиэгин тулалыыр эйгэтин үөрэтии уонна “Үс-кут” научнай-практическай үлэлэр  түмүктэннилэр.

«Инновационнай өттүнэн ыллахха, бастакытынан, төрүт үгэспитин цифровой эйгэҕэ көһөрөн үйэтиттибит. Иккиһинэн, Кытай дойдутуттан робот оҥорор собуоттан оскуола иннинээҕи саастаах оҕолорго интерактивнай муоста ыллыбыт, манна оҕолорбутун тулалыыр эйгэни харыстыырга оонньуу нөҥүө үөрэтэбит. Үсүһүнэн, бырайыак үлэтин чэрчитинэн “Үс-кут» эйгэни тэрийиигэ Саха тылын кэбиниэтигэр тупсарыы үлэтин ыыттыбыт. Соторутааҕыта түмүктүүр тэрээһиммитин ыыттыбыт – Саха тылын уонна литэрэтиирэтин кэбиниэтин астыбыт», — диэн Н.Д. Субуруускай аатынан Болтоҥо орто оскуолатын дириэктэри иитэр үлэҕэ солбуйааччы Диана Павлова кэпсиир.