Болтоҥолор Семен Новгородовка саҥа пааматынньыгы туруорсаллар

Болтоҥолор Семен Новгородовка саҥа пааматынньыгы туруорсаллар

Ааптар:
14.02.2024, 15:15
Егор Карпов хаартыскаҕа түһэриитэ.
Бөлөххө киир:

Болтоҥоҕо тиийбит СӨ Бырабыыталыстыбатын 2023 сыллааҕы отчуоттуур бөлөҕө мунньах иннинэ Семен Новгородов төрөөбүт Чуораайытта алааһыгар тиийэн, саха омук суругун-бичигин төрүттээбит лингвист-учуонай пааматынньыгар сибэкки уурдулар.

Болтоҥолор отчуотка бэлэмнэнэн үгүс ыйытыыларын суругунан туттарбыттар. Үгүс ыйытыы атын сирдэргэ баар кыһалҕалары кытта майгынныыллар. Ол курдук, быраас суоҕа улахан моһуок буолбут. Манна быһаарыы көстүөх курдук – олохтоох ыал оҕото үөрэҕин бүтэрэн кэлиэхтээх эрээри, атын сиргэ тус сыаллаах направлениелаах эбит. Бу үлэһити дойдутугар кэлэригэр үлэлэһиэх буоллулар.

Олохтоох дьаһалта үлэһитэ: “Чурапчы улууһугар военкомат чааһын аһыҥ, ыҥырыллыбыт дьоммут Таатта военкоматыгар сурутан бараллара кэккэ уустуктары үөскэтэр. Эрдэ улуус киинигэр военкомат үлэлиир этэ, дьиэтэ баар”, — диэн тустаах уорганнарга тиэрдиҥ диэн туруорсуутун этэн боротокуолга киллэттэрдэ.

“150 төбөҕө анаммыт хотон тутуом этэ, олохтоох кырдьаҕастар сүөһүлэрин эһимээри, көрдөрүөхтэрин баҕараллар. Көмө баар буолуо дуо?” — диэн ыйытыыны суругунан биэрдилэр. Бу бачыымы улуус дьаһалтатын бэрэстэбиитэллэрэ үөрэ иһиттилэр, өйөбүл хайаан да баар буолуо диэн эрэннэрдилэр.

Өссө биир туруорсуу аатырбыт биир дойдулаахтарыгар Семен Андреевич Новгородовка сөптөөх таһымнаах пааматынньыгы туруоруу туһунан буолла. “Бэйэтин кэмигэр олохтоох энтузиаст тимиринэн уонна бетонунан оҥорбута. Анал үөрэҕэ суох киһи оҥоһуга үчүгэй, ол эрээри атын сиртэн ытыгылаан кэлэр дьоҥҥо көрдөрөргө арыый үрдүк таһымнаах пааматынньык ордук буолуо этэ”, — диэбит сурук ааптара. Отчуоттуур делегация туруорсууну сөптөөҕүнэн аахта, Халыма трассатын кытыытыгар турар Чуораайытта алааска саҥа пааматынньыгы оҥоруу туһунан этиини үлэҕэ ылар туһунан боротокуолга киллэрдилэр.

Оскуолаҕа өр сыл дириэктэринэн үлэлээбит Захар Егорович Егоров биир ыйытыыны биэрдэ. “Амма төрдүгэр сир баайын хостуур үлэ тэриллээри турар диэн сурах кэллэ. Бу кырдьык дуо? Кырдьык буоллаҕына, Саха сиригэр ырааһынан аатырар өрүспүтүн харыстыыр үлэни Айылҕа харыстабылын министиэристибэтэ ыытар дуо?” — диэн ыйытта. Бу ыйытыыга Бырамыысыланнас департаменын бэрэстэбиитэлэ Михаил Винокуров хоруйдаата: “Ол диэки АЛРОСА чинчийэр үлэлэри ыыппыта. Ол эрээри, ханнык даҕаны хостуур үлэлэр ыытыллыбаттар, өтөрүнэн оннук үлэ ыытыллара сабаҕаламмат. Сыыһа сурах тарҕаммытын билэбит, ити хайысхаҕа быһаарар үлэ ыытыллыбыта”.

Захар Егорович тылын түмүгэр Саха сирин Бырабыыталыстыбатын 2023 сыллааҕы үлэтэ бэрт күүскэ барбытын бэлиэтээн туран, отчуот үлэтин сөптөөҕүнэн ааҕарын биллэрдэ. Мунньахха мустубут дьон бу этиини сөбүлэһэн, отчуоттуур үлэни ылыналларын биллэрэн биир киһи курдук куоластаатылар.

+1
1
+1
0
+1
0
+1
0
+1
0
+1
0
+1
0
Бары сонуннар
Салгыы
24 мая
  • 13°C
  • Ощущается: 11°Влажность: 35% Скорость ветра: 0 м/с

Сообщить об опечатке

Текст, который будет отправлен нашим редакторам: