Болугур олохтоохторо байыастарга ыыһаммыт эти ыыттылар

Анал байыаннай дьайыыга кытта сылдьар биир дойдулаахтарбытыгар Саха сирин олохтоохторо, волонтердар туох кыахтаахтарынан көмөлөһөллөр. Улуустартан тиһигин быспакка эт, балык, булт, бурдук аһын олохтоохтор хомуйан ыыталлар.

Бүгүн Амма улууһун Болугур нэһилиэгин олохтоохторо убаһа этин хомуйан, ыыһаан анал байыаннай дьайыыга сылдьар уолаттарга ыытарга бэлэмнээн Дьокуускай куоракка, Светлана Диодорова-Лаврентьеваҕа аҕалан туттардылар.

Болугур олохтоохторун баһыылкаларын нэһилиэк баһылыга Андрей Петров Дьокуускайга аҕалан биэрдэ. Кини биир дойдулаахтарбыт этэҥҥэ сылдьан, дойдуларын аһын аһаан, күүс-уох эбинэн, Кыайыыны түргэнник аҕалыахтарыгар эрэнэр.

“Хас биирдии нэһилиэк анал байыаннай дьайыыга сылдьар биир дойдулаахтарбытыгар көмөҕө кыттыһа олорор. Ол курдук биһиги, Болугур олохтоохторо эмиэ уолаттарбытыгар диэн, убаһа этин ыыһаттаран аҕаллыбыт. Салгыы Светлана Владимировналаах уолаттарбытыгар илдьиэхтэрэ. Уолаттарбытыгар кытаатыҥ, этэҥҥэ сылдьыҥ диэм этэ. Хайаан даҕаны кыайыахпыт!”, — диир Андрей Петров.