Болугурга икки бөрө бултанна

Быйыл кыһын, этэргэ дылы, саҥа хаарга ким хас бөрөнү бултаабытын туһунан сураспыппар: “Амма Болугуругар Георгий Филиппов бултаабыт үһү”, — диэтилэр.

Кырдьык, Болугур булчута, бэйэтэ сэмэйдик этэринэн, үһүс сылын бу адьырҕаны сонордоһор Георгий Филиппов ахсынньы 7 күнүгэр икки бөрөнү хапкааннаан ылбыт. Кинини булт албастарыгар, хапкааны хайдах, ханна иитэргэ убайа Михаил Михайлович Филиппов уһуйбут.

— Кулааһайы тутан сиэн эрэллэригэр түбэспитим, ол иһин кэлэн хапкаан ииппитим. Мин икки эрэ адьырҕаны көрбүтүм. Дьиҥэ, бэһиэлэр быһыылаах этэ. Билиҥҥитэ  сылгыны улаханнык тыыта иликтэр. Биир биэни хонноҕун анныттан тоҕо тардыбыт этилэр. Болугурга билигин да элбэхтэр. Сыбаалка таһыгар көрдүбүт диэбиттэрин иһин баран суоллаабытым. Хапкаан ииппитим, тыаттан бу саҥа киирдим, сарсын баран көрөр инибин. Аттынааҕы үрэхтэринэн бөрө элбэх, иккилии-үстүү, соҕотох да буолан сылдьаллар, — диир булчут.

Быйыл Амма улууһун баһылыга Степан Кузьмин бөрөнү бултааһыҥҥа бириэмийэ олохтообута кэрэхсэбиллээх. Биир бөрөнү сууһарыы иһин булчут 20 тыһыынча солкуобайы ылыахтаах. Бу күннэргэ ол харчылара түһэн, бөрөһүттэр үөрүү бөҕөлөрө. Тустаах күрэхтэһиигэ Олом Күөл сонордьута бастаабыт.

— Амма улууһун сонордьуттара өссө да маннык бириэмийэ көрөн, өйүүллэрэ буоллар, эккирэтиһэн бултуо этибит диэн баҕалаахтар.  Иһиттэххэ, бөрөһүттэргэ бириэмийэ олохтооһуҥҥа улуус-улуус араас балаһыанньалаахтар быһыылаах. Болугур дьаһалтатын баһылыга былырыын сылгылары бөрөлөр тардыбыттарыттан, бу кыыллары уодьуганнаатыннар диэн хапкаан атыылаһан биэрбитэ, уматыгынан көмөлөспүтэ. Улуустааҕы Экологиябыт иниспиэксийэтэ эмиэ сүрдээх кыһамньытын уурар. Биһиги “Бөрө ахсаанын сүрүннээһин” диэн лиссиэнсийэнэн бултуубут. Ол эрээри  бу лиссиэнсийэбит үс эрэ күннээх. Ити кэмҥэ киһи таба түбэһэн бултаабат буоллаҕа. Хапкааҥҥын иитэн баран, кэтэһиэххин, кэлэн иҥниэн наада. Саатар, ый эбитэ буоллар, диэн баҕалаахпыт , — диэтэ Георгий Сергеевич.