Болуоссакка дьоллоох пааралар вальска эргийдилэр
08.07.2025, 17:42
Хаартыска: А.Васильева.
Бөлөххө киир:
От ыйын 8 күнүгэр Дьиэ кэргэн, таптал, бэриниилээх буолуу күнэ бэлиэтэнэр. Сайыҥҥылыы ылааҥы, чаҕылхай күннээх күн Дьокуускайга Өрөспүүбүлүкэ болуоссатыгар үөрүүлээх тэрээһин ыытылынна. Бу тэрээһини ЗАГС управлениета тэрийдэ.
Болуоссакка маҥан былааччыйалаах, көстүүмнээх, киэргэммит пааралар таптал вальсыгар уйдаран, үҥкүүлээн эргичийдилэр. Бу аахсыйаҕа саҥа ыал буолбут пааралар уонна 25, 50 сыл бииргэ олорбут ыаллар кытыннылар.
Бу үөрүүлээх түгэҥҥэ үйэ аҥаара иллээхтик-эйэлээхтик, таптаһан олорбут ыаллар — Айталина, Алексей Поповтар, Галина, Алексей Нестеровтар, Арабелла, Виктор Богомоловтар, Людмила, Иван Неустроевтар «Дьиэ кэргэн килбиэнэ» диэн Бочуоттаах бэлиэнэн наҕараадаланнылар. Кинилэри оҕолоро, сиэннэрэ эҕэрдэлээбиттэрэ үөрүүлэрин ордук үрдэттэ.
Бу күн Өрөспүүбүлүкэ болуоссатыгар эдэркээн уоллаах кыыс ыал буолар, саахсаланар түгэннэрэ олус долгутуулаах буолла. Кинилэри бырабыыталыстыба бэрэссэдээтэлин солбуйааччы Ольга Балабкина эҕэрдэлээтэ, өр сылларга таптаһан, өйдөһөн, оҕо-уруу төрөтөн, алаһа дьиэ тэринэн, иллээхтик олороллоругар баҕарда.
Салгыы «Дьиэ кэргэн үгэстэрэ — көлүөнэлэр утумнара» диэн видеонан күрэс түмүгүн таһаардылар. Күрэскэ олус үчүгэй роликтар киирбиттэр.
2025 сыл саҕаланыаҕыттан 1900 саҥа ыал баар буолла, ол иһигэр 25 саастарын туола илик 364 паара 50 тыһыынча солкуобайдаах төлөбүрү ылбыта.
Сообщить об опечатке
Текст, который будет отправлен нашим редакторам: