«Боотур» этэрээт тэриллибитэ икки сылын бэлиэтиир

«Боотур» этэрээт 2022 сыллаахха бэс ыйын 18 күнүгэр СӨ Бойобуой дьайыылар Ассоциациятын көҕүлээһининэн тэриллибитэ.

Ол курдук, Саха сиригэр икки сыл анараа өттүгэр баҕа өттүнэн сулууспалааччылары бэлэмниир киин баар буолбута. Хаачыстыба сүрүн киритиэрийэ — чөл олоҕу тутуһуу, дойдуларыгар төннөр байыастар ахсаанын элбэтии. «Боотур» этэрээттэн үрдүк судаарыстыбаннай наҕараадаҕа тиксибит байыастар ахсаана элбиир. Кинилэр ортолоругар хамандыыр, РФ Дьоруойа, анал байыаннай дьайыы кыттыылааҕа Александр Колесов буолар. Биһиги кинилэринэн киэн туттабыт», — диэн Ил Дархан Айсен Николаев бэлиэтиир. Киин аһыллыаҕыттан 950-тан тахса киһи тус этии киллэрбит. Анал байыаннай дьайыы үөрэҕин ааһан, зона хонуутугар барыта 16 бөлөх тэриллэн ыытыллыбыт. Кинилэр истэригэр 624-тэн тахса байыас ситиһиилээхтик сулууспалааннар, дьиэлэригэр төннүбүттэр.

Хорсун быһыыларын иһин «Боотур» этэрээт 367 байыаһа араас уордьаннарынан уонна мэтээллэринэн, РФ Дьоруойа уордьанынан, «Хорсунун иһин» мэтээллэринэн наҕараадаламмыттара.

Үөрүүлээх тэрээһиҥҥэ СӨ Ил Дарханын уонна Бырабыыталыстыбатын дьаһалтатын салайааччыта Георгий Михайлов уонна былаас, уопсастыбаннай тэрилтэлэр уорганнарын салайааччылара хорсун быһыыларын уонна дьоруойдуу сыһыаннааһыыларын иһин махтал тылларын эттилэр.
«Эһигиттэн хас биирдиигит этэрээт ситиһиилэригэр бэйэтин тус кылаатын киллэрбитэ. Хас биирдиигит тылынан буолбакка, барытын дьыалатынан көрдөрөр» — диэн Георгий Михайлов байыастарга эҕэрдэ тылларын анаата. Кини төрөөбүт дойдуларын көмүскэлигэр туруммут «Боотур» этэрээт байыастарынан норуот бүттүүнэ киэн туттарын бэлиэтээтэ.