“Боотур” этэрээт кыттааччылара анал эпэрээссийэттэн бүгүн Дьокуускайга кэллилэр

“Боотур” этэрээт кыттааччылара анал эпэрээссийэттэн бүгүн Дьокуускайга кэллилэр

23.12.2022, 09:35
Бөлөххө киир:

Бүгүн, ахсынньы 23 күнүгэр, “Боотур” өрөспүүбүлүкэтээҕи этэрээтин баҕа өттүнэн кыттааччыларын Дьокуускайга үөрэ көрүстүлэр.

“Боотур” этэрээт бойобуой сорудаҕы толорууга бэйэтин бэлэмнээх уонна көдьүүстээх чаас быһыытынан көрдөрдө. Этэрээт бары байыастара бэйэлэрин харыстаммакка, сатабыллаахтык уонна хамандыырдар бойобуой бирикээстэрин толору, байыаннай иэстэрин чиэһинэйдик толордулар.

“Уолаттар соруктарын дьоһуннаахтык толордулар. Саха сиринээҕи батальону саҥа үрдүк таһымҥа таһаардылар. Өйөбүлгүт иһин өрөспүүбүлүкэҕэ улахан махтал. Билигин онно хаалбыт уолаттарбыт туһугар долгуйабын, ол иһин төттөрү төннөр наада”, — диэн “Пилигрим” биллэрэр бэлиэлээх (позывной) “БАРС-2” батальон ыстаабын начаалынньыга бэлиэтиир.

“Патриотизм биһиэхэ хааммытыгар баар. Оргуйар, умайар. Ким даҕаны куттаммата, дьиҥ киирсиигэ ким даҕаны саспата. Биһиги уолаттарбыт хаһан даҕаны халбаҥнаабаттар уонна хорсун быһыылаахтар. Байыастар ааттарыттан Ил Дархан Айсен Николаевка, бары биир дойдулаахтарбытыгар өйөбүллэрин иһин махтанабыт. Өрөспүүбүлүкэбитинэн киэн туттабыт. Этэрээппитигэр тиһигин быспакка тиэхиньикэ, сэп-сэбиргэл уонна бородуукта кэлэ турда. Төрөөбүт дойдубут иннигэр ытык иэспитин төлүүр түгэн тирээн кэлбитигэр, олохтоохтор, баҕа өттүбүтүнэн көмүскүүргэ туруммуппут уонна кэһиллибэт иэспитин төлөөтүбүт. Инникитин даҕаны ити курдук буолуо диэн эрэнэбин”, — диэн “Злой” диэн аатынан ыҥырыллар этэрээт хамандыырын байыаннай-бэлитиичэскэй үлэҕэ солбуйааччыта этэр.

Бырабыыталыстыба бэрэссэдээтэлэ Андрей Тарасенко аэропорка байыастары көрсөрүгэр, Ил Дархан сорудаҕынан хас биирдии дойдутугар кэлбит этэрээт байыаһыгар саха быһахтарын бэлэхтээтэ.

Ил Дархан Айсен Николаев өрөспүүбүлүкэ биллэр маастардарыттан Саха сирин байыастарыгар саха быһаҕын оҥороллоругар эрдэ этэн турар.

“Биһиги эр дьоммутугар саха быһаҕа улахан суолталаах. Бу булка-алка илдьэ сылдьар үгэс уонна олоххо-дьаһахха туһанарга эрэ аналлаах буолбатах, хаһаайынын көмүскүүр дьиҥнээх харысхал. Биһиги байыаннай сулууспалаахтарбыт санааларын өйүүр туһугар уустар саха быһаҕын оҥороллоругар этии көтөхпүтүм. Маастардар көхтөөхтүк ылыммыттара”, — диэн Айсен Николаев бэйэтин телеграм-ханаалыгар суруйар.

Саха быһахтарын улаханнык ытыктаан уонна киэн туттан туран бүгүн дойдуларыгар үктэммит байыастарга туттардылар.

“Баҕа өттүнэн кыттыбыт дьоҥҥо сулууспаҕыт иһин махтанабын. Саамай сүрүнэ – күүс-сэниэ ылыныы, доруобуйа уонна дьиэ кэргэни кытта бииргэ буолуу. Кинилэри кэтэһэллэрин, ытыктыылларын уонна таптыылларын өйдүүллэрэ улахан суолталаах”, — диэн Андрей Тарасенко бэлиэтээтэ.

Ил Дархан уонна Бырабыыталыстыба пресс-сулууспата.

Мария ВАСИЛЬЕВА (СИА) хаартыскаҕа түһэриитэ.

Лента
Салгыы
5 февраля
  • -37°C
  • Ощущается: -37°Влажность: 67% Скорость ветра: 1 м/с

Сообщить об опечатке

Текст, который будет отправлен нашим редакторам: