Бүгүн сарсыарда Дьокуускайга «Боотур» өрөспүүбүлүкэтээҕи добровольческай этэрээт байыастара эргиллэн кэллилэр.
Төрөөбүт дойдуларыгар эргиллэн кэлбит байыастары СӨ Ил Дархана Айсен Николаев, байыастар дьиэ кэргэттэрэ, чугас дьонноро, доҕотторо, кэллиэгэлэрэ көрүстүлэр.
«Төрөөбүт дойдугутугар этэҥҥэ эргиллибиккититтэн олус үөрэбин. Биһиги доброволецтарбыт анал байыаннай эпэрээссийэҕэ кинилэр иннилэригэр туруоруллубут бары соругу чиэстээхтик толордулар. Кинилэр ити кэмҥэ дойдулаахтарын өйөбүллэрин билбиттэрин, ол кинилэргэ күүһү-уоҕу, эрэли биэрбитин эттилэр. Саамай кылаабынайа, дьиэлэригэр кэллилэр. Биһиги бэйэбит өттүбүтүттэн кинилэргэ сөптөөх көмөнү оҥоруохпут«, — диэтэ Айсен Николаев.
«Боотур» этэрээттэн Дьокуускайга бүгүн 13 байыас кэллэ.
«Маннык көрсүһүүнү күүппэтэхпит. Наһаа үөрдүбүт. Биһигини чугас дьоммут, доҕотторбут көрүстүлэр. Бырабыыталыстыбаҕа, Ил Дархан Айсен Сергеевичкэ анал байыаннай эпэрээссийэҕэ сылдьар кэммитигэр улахан көмөлөрүн, өйөбүллэрин иһин махтанабыт«, — диэтэ этэрээт хамандыыра Александр Колесов.
Хомойуох иһин, бүгүн төрөөбүт сирдэригэр-уоттарыгар этэрээт байыастарын сорохторо эргилиннилэр.
Ил Дархан Айсен Николаев сырдык тыыннарын толук уурбут дьоруойдар чугас дьонноругар дириҥ кутурҕанын тиэртэ.
«Саха сириттэн аҕыс байыас дойдубут кэлэр кэскилин, биһиги барыбыт инники олохпут туһугар сэрии толоонугар сырдык тыыннарын толук уурдулар. Кинилэр тустарынан сырдык өйдөбүл биһиги өйбүтүгэр-сүрэхпитигэр мэлдьи тыыннаах буолуо. Биһиги кинилэр дьиэ кэргэттэригэр, чугас дьонноругар кыһамньыбытын ууруохпут...», — диэтэ Айсен Николаев.
Санатан эттэххэ, «Боотур» өрөспүүбүлүкэтээҕи добровольческай этэрээти тэрийии туһунан быһаарыы быйыл бэс ыйыгар ылыллыбыта. Этэрээт байыастара анал байыаннай эпэрээссийэҕэ барбыттара. Кинилэр «Барс» иккис этэрээтигэр киллэриллибиттэрэ уонна Харьков уобалаһыгар байыаннай соруктары толорбуттара.
СӨ Ил Дархан уонна Бырабыыталыстыба пресс-сулууспата
Хаартыскаларга Андрей Сорокин (СИА) түһэриилэрэ
Эми-тому атыылаһан баран, аны хайдах иһэр туһунан ыйыыны-кэрдиини (инструкцияны) төһө билсэбитий? «Күҥҥэ үстэ биир табылыакканы…
Саха сиригэр физическай култуура уонна успуорт сайдыытыгар, хаачыстыба өттүнэн үрдүк кэрдиискэ тахсарыгар кылгас олоҕун анаабыт…
Бу күннэргэ Горнай улууһун Бэрдьигэстээх сэлиэнньэлэрин түөлбэлэрэ сыл устата ыытыллар күрэстэр чэрчилэринэн, өбүгэ саҕаттан оонньонор…
Кыыллаахтар барахсаттар, уустук олоххо уһаарыллыбыт, кыһалҕаҕа кыһарыйтаран кылааннааммыт буолан бу да сырыыга түмсэннэр, улахан уу…
Нам улууһун "Маймаҕа нэһилиэгэ” МТ баһылыга Александр Егоров иһитиннэрбитинэн, бүгүн, ыам ыйын 18 күнүгэр, 16:00…
Саха сирин Ил Дархана Айсен Николаев Хэйлунцзян провинциятын губернатора, хотун Лян Хуэйлин кытары оробуочай көрсүһүүтүгэр…