«Боотур» этэрээт тэриллибитэ 3 сыла

Бэҕэһээ Үүнэр көлүөнэ тыйаатырыгар «БАРС-2, Боотур» добровольческай этэрээт тэриллибитэ 3 сылын бэлиэтээтилэр. Тэрээһиҥҥэ этэрээт састаабыгар киирэн анал байыаннай дьайыыга кыттыбыт байыастар, кинилэр чугас дьонноро уонна ыҥырыылаах ыалдьыттар кытыннылар.

Бэлиэ тэрээһин анал байыаннай дьайыыга сылдьан сырдык тыына быстыбыт, талааннаах хоһоонньут Василий Рожин хомоҕой хоһоонунан аһылынна. Ол кэннэ СӨ Баһылыгын уонна Бырабыыталыстыбатын дьаһалтатын салайааччыта Георгий Михайлов өрөспүүбүлүкэ салалтатын аатыттан эҕэрдэлээтэ.

«Үс сыл анараа өттүгэр анал байыаннай дьайыы саҕаламмытыгар Саха сирин доброволецтарын этэрээтэ тэриллибитэ уонна «Боотур» диэн ааттаммыта. Бу үс сылы быһа этэрээт байыастара дойдуларын чиэстээхтик көмүскүү сылдьаллар. Эһиги билигин туспа бырабылыанньаланныгыт, хас биирдиигитин өйүүр этэрээт хамандыырданныгыт. Анал байыаннай дьайыы кэмигэр этэрээт байыастара судаарыстыбаннай наҕараадаларынан бэлиэтэннилэр, ол иһигэр Арассыыйа Дьоруойа Александр Колесов баар. Элбэх саллаат «Эр санаа» уордьанынан, бойобуой наҕараадаларынан бэлиэтэннэ», — диэтэ Георгий Михайлов.

Салгыы СӨ Баһылыгын уонна Бырабыыталыстыбатын дьаһалтатын салайааччыта Георгий Михайлов анал байыаннай дьайыыга хорсун уонна дьоруойдуу быһыыны көрдөрбүт байыастарга наҕараадалары туттарда.

Бу күн этэрээт байыастарын Ил Түмэн бэрэссэдээтэлин солбуйааччы Афанасий Владимиров, Арассыыйа Дьоруойа, норуот дьокутаата Александр Колесов, СӨ Ис бэлиитикэтин департаменын салайааччыта Александр Трофимов, СӨ гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйыы миниистирин солбуйааччы Яна Наумова, доруобуйа харыстабылын миниистирин бастакы солбуйааччы Дмитрий Сергин, экология миниистирин солбуйааччы Лука Сафонов, үп миниистирин солбуйааччы Леонид Александров, ону тэҥэ CӨ Бойобуой дьайыылар бэтэрээннэрин ассоциациятын бэрэссэдээтэлэ, «Боотур» этэрээт салайааччыта Иван Черкашин эҕэрдэлээн тыл эттилэр.

Иван Черкашин этэрээт тэриллибит устуоруйатын, үлэтин-хамнаһын, боотурдар дьоруойдуу быһыыларын кэпсээтэ. Саха сириттэн анал байыаннай дьайыыга кыттыбыт байыастар инникитин биир сомоҕо буолан түмсэллэригэр баҕарарын эттэ.

«Биһиги этэрээппит тэриллибитэ үс сыл буолла. Биһиги ортобутугар бүгүн Арассыыйа Дьоруойа, 90-ча «Эр санаа» уордьанын кавалера, 400-н тахса атын даҕаны бойобуой наҕараадалардаах байыастар бааллар. Уолаттар сэрии толоонугар ураты хорсун-хоодуот быһыыны көрдөрөллөр. Аҕыйах ахсааннаах саха норуотун харыстыыр туһуттан, билиҥҥи кэмҥэ, маннык батальоннары тэрийиэххэ наада дии саныыбын. Ахмат, боотур диэн арахсыбакка, билиҥҥи кэмҥэ бары биир сүнньү тутуһуохтаахпыт. Дойдуларын көмүскүү сылдьар саха буойуттара бары боотурдар. Саха норуотун былыр-былыргыттан боотурдар көмүскүүллэр, ол курдук биһиги уолаттарбыт эмиэ дойдуларын көмүскүүллэр. Онон инникитин «Боотур» бэлиэни Ил Дархаммыт туттарара буоллар диэн баҕа санаалаахпыт. Мобилизацияламмыт, хантараактаспыт, бэйэ баҕатынан барбыт диэн арахсымыаххайыҥ, бары түмсэн, дойдубут туһугар үлэлиэххэйиҥ-хамныаххайыҥ диэн ыҥырабын. Айсен Николаев «Дьоруойдар бириэмэлэрэ» диэн уһулуччулаах бырайыагы толкуйдаан үлэлэтэн эрэр. Бүгүн биһиги уолаттарбыт онно киирэн үөрэнэ сылдьаллар. Кинилэр буолуохтара Саха сирин көҕүлүүр уонна ыччакка холобур буолар дьоммут», — диэн эттэ Иван Черкашин.

Салгыы дьоруойдуу, хорсун быһыыны көрдөрбүт саха боотурдарыгар наҕараадалары туттардылар.

«За храбрость» мэтээл II истиэпэнэ – Михаил Захаровка (позывной «Алмаз»), «За доблесть» уордьан II истиэпэнэ – Софрон Пономаревка уонна Александр Сахаровка, «За заслуги» мэтээл II истиэпэнэ – Сергей Кондаковка, «За верность долгу» мэтээл – Прокопий Дьячковскайга, «За спасение жизни» мэтээл – Нюргустана Петроваҕа уонна Максим Нарахаевка туттарылынна. Итини таһынан элбэх байыаска «За боевые заслуги» уонна «За отвагу» бэлиэлэр туттарылыннылар.

Бу үөрүүлээх күн тыылга күүс-көмө буолар, саха далбар хотуттарын – волонтердары эмиэ эҕэрдэлээтилэр. Ону сэргэ «Боотур» этэрээт салалтата бииргэ үлэлэһэр тэрилтэлэригэр, урбаанньыттарыгар эмиэ Махтал суруктары туттарда.

Бэлиэ тэрээһиҥҥэ ылбаҕай ырыалар ылланнылар, хоһооннор ааҕылыннылар. Кырачаан  Виктория Ся «Мой папа ушёл на войну» хоһоону ааҕан дьон кутун-сүрүн тутта. Кини аҕата Кирилл Ся анал байыаннай дьайыы кыттыылааҕа, «За боевые заслуги» мэтээлинэн наҕараадаламмыта.

Саллаат аҕата, эстрада тыйаатырын артыыһа Аркадий Николаев-Эрхаан, Кэлэр көлүөнэ тыйаатырын артыыстара Айталыына Яковлева уонна Анастасия Петрова байыаннай ырыалары ыллаатылар.

Инники кирбиигэ сылдьар «Боотур» этэрээт байыастара видеонан үс төгүл уруйдаан-айхаллаан эҕэрдэ тылларын эттилэр.

Бэлиэ күн тэрээһинин түмүгэр «Боотурдар» Ийэ дойдубут көҥүлүн туһугар сырдык тыыннарын толук уурбут доҕотторун, дойду дьоруойдарын үтүө ааттарын кэриэстээн тохтобул мүнүүтэтигэр иһийэн турдулар.