Боотур Уус сыдьааннара Албан аат суолунан айаннаан кэллилэр

Чурапчы улууһугар «Боотур Уус сыдьааннара» бырагыраама чэрчитинэн иккис сылын ыытыллар «Ытык дьоммут хорсун быһыылара — үйэлэргэ өйдөбүл» патриотическай бырайыак үлэлиир.

Бу күннэргэ улуус оскуолаларын 21 үөрэнээччитэ, 2 салайааччыларын кытта муус устар 23 — ыам ыйын 1 күннэригэр Чурапчы-Дьокуускай-Москва-Новгород-Старая Русса-Санкт Петербург-Москва-Дьокуускай-Чурапчы хайысханан Албан аат суолунан айаннаан кэллилэр.

“Улуу Кыайыы 80 сылыгар уонна Улуу Ильмеҥҥэ кыргыһыыга эйэлээх олох туһугар охсуспут уонна тымныы муус анныгар тыыннарын олук уурбут буойуттарбытын үйэтитэр, кэнчээри ыччакка тириэрдэр сыаллаах айаммыт соруга ситтэ. Оҕолорбут бары олус үчүгэй эппиэтинэстээхтэрин, киэҥ билиилээхтэрин өссө төгүл бигэргэттилэр. Бу күннэргэ бары биир дьиэ кэргэн оҕолорун курдук иллээхтик сырыттылар. Барыларыгар умнуллубат, өйдөнөн хаалар түгэнинэн буолла, элбэх доҕоттору кытта билиһиннэрдэ, саҥа хатыламмат үөрүүнү бэлэхтээтэ. Бу айаны тэрийбит улууспут дьаһалтатыгар, баһылыкпытыгар Степан Анатольевичка, үөрэхпит салалтатыгар, салайааччыбытыгар Юрий Павловичка айаҥҥа иилээн-саҕалаан оҕолору илдьэ сылдьыбыт салайааччыларбытыгар Парасковья Михайловнаҕа, Егор Владимировичка, айан бырагырааматын тэрийбит Галина Семеновнаҕа, соҕуруу куораттарга дэлэгээссийэни иилээн-саҕалаан илдьэ сылдьыбыт Виктор Семеновичка махтанабыт! Күндү оҕолорбутугар, үөрэнэр, сайдар баҕа санаалара хаһан да уҕараабатын, мэлдьи истиҥ эйгэ, ыраас санаа, эрэл эрэ арыаллаатын, үөрэхтэригэр үрдүк ситиһиилэри баҕарабыт”, — диэн төрөппүттэр махталлараын тиэртилэр. Бу туһунан улуус дьаһалтатын телеграм-ханаала сырдатта.