Борис Полуэктов: «Өлүөхүмэлэр уолаттарын күүскэ өйүүллэр»

Өлүөхүмэ дьаһалтатыгар улуус дьыалаларыгар управлениены салайар Борис Полуэктов байыаннай эпэрээссийэҕэ кытта барбыт байыаннай сулууспалаахтарга уонна кинилэр дьиэ кэргэттэригэр гуманитарнай көмөнү тэрийиини сүрүннүүр үлэни ыытар.

— Ааспыт сыл балаҕан ыйын 27 күнүгэр Ресурснай киин баазатыгар быстах ыҥырыы боппуруостарынан дьарыктанар оройуоннааҕы волонтерскай киин тэриллибитэ. Күн бүгүн бу киин сүрүн састаабыгар Өлүөхүмэ куоратын волонтердара итиэннэ Уһук Илиҥҥэ, Доннааҕы Ростовка куоракка баар биир дойдулаах волонтердарбыт киирэллэр.
Киин үлэтин сүрүн хайысхатынан быстах ыҥырыынан сулууспалааччылары кытта үлэни сүрүннээһин, этиилэри, сайаапкалары ылыы, нэһилиэнньэттэн, тэрилтэлэртэн, спонсордартан үбү хомуйуу, онон киирбит сайаапкаларынан көрөн таҥаһы-сабы, тэриллэри ылыы, гуманитарнай көмөнү ыытыы, нэһилиэнньэ ортотугар көмөҕө аналлаах аһымал аахсыйаларын тэрийэн ыытыы, Ростов-на-Дону куоракка баар волонтердарбытын кытта үлэ.
Бу кэмҥэ диэри байыаннай эпэрээссийэҕэ кытта барбыт байыаннай сулууспалаахтарга уонна кинилэр дьиэ кэргэттэригэр гуманитарнай көмөнү оҥорууга уопсайа араас хайысханан 12 мөл. 740 тыһыынча солкуобай хомулунна. 2022 сыл балаҕан ыйын 27 күнүттэн 2023 сыл кулун тутар 31 күнүгэр диэри кэмҥэ улуус нэһилиэнньэтиттэн 6 718 106 солкуобайдаах үп хомуллубута. Ону сэргэ бүддьүөт араас таһымнарыттан 4 мөл. 22 тыһыынча солкуобай көрүллүбүтэ. Бөдөҥ компания 2 мөл. солкуобайы киллэрбитэ. Гуманитарнай көмөҕө анаан 6 аһымал аахсыйа, «Өлүөхүмэ саллаатыгар баһыылка» ыытыыта, онтон да атын үлэлэр салҕанан бара тураллар. Өлүөхүмэ улууһуттан байыаннай дьайыы сиригэр 2,5 тн. гуманитарнай көмө ыытылынна.

Буойуттарбытыгар байыаннай суолталаах тэриллэри ылан ыытабыт: тепловизордар, монокулярдар — 28, тепловизионнай прицел – 1, түүн хараҥаҕа көрөр тэрил (ночники) — 12, квадрокоптердар (“Мавик” 2, 3 уонна да атын көрүҥнэрэ) – 15, рациялар – 56, бронежилеттар, тактическай атах таҥаһа, онтон да атын анал таҥас-сап, тэрил.
Өлүөхүмэ улууһугар байыаннай сулууспалаахтары уонна кинилэр дьиэ кэргэттэрин хара бастакыттан барыларын учуокка ыламмыт, өйөбүлү, көмөнү оҥоро олоробут. Өлүөхүмэҕэ хас биирдиилэригэр волонтер анаммыта. Бастаан бу үлэҕэ дьахталлар үлэлээн испиттэрэ, ол гынан баран байыаннай усулуобуйаҕа наадалаах тэриллэри билэр-көрөр киһи наада буолан, билигин эр дьон үлэлии сылдьар. Куратор волонтердабыт 67 байыаннай сулууспалаах бөлөҕүн көрөн-истэн көмөлөһөллөр. Уопсайа, 200 байыаннай сулууспалаахтан, 155-тэн тахсата быстах ыҥырыынан сулууспалыыллар. Байыастартан сайаапка киирдэҕинэ, наадалаах көмөнү хомуйууга, тэрийиигэ өссө көдьүүстээх буоллун диэн, ону туһааннаах нэһилиэктэр баһылыктарыгар, үлэлии сылдьыбыт трилтэлэригэр тиэрдэ олоробут.

Билигин биһиги улуустан Өрөспүүбүлүкэтээҕи сүрүннүүр кэлим киин (РЕКЦ) састаабыгар биир волонтер үлэлии сылдьар. Ону сэргэ, өссө биир волонтер баһыылкалары оҥорууга көмө эбии ылылынна.
Оройуон дьаһалтата тохсунньу ортотугар Волонтер киинин тирэх пууннарыгар сырыыларга наадалаах биир УАЗ-Патриот массыынаны Доннааҕы Ростов куоракка ыыппыта.
Чугастааҕы ыйдарга биһиги биир сыалбытынан тепловизионнай уонна коллиматорнай прицеллары булан ыытыы. Итинтэн атын өттүгэр өрөспүүбүлүкэ салалтатын көмөтүнэн хааччыллыы балачча тубуста. Доннааҕы Ростовка үлэлиир волонтердарга микроавтобус ылары былаанныыбыт.

Бу курдук биһиги улууспут уолаттарын, кинилэр дьиэ кэргэттэрин күүскэ өйүү, көмөлөһө олорор.