Борисовтарга Тимур Ханды ыалдьыттаата

Мэҥэ Хаҥалас Төҥүлү нэһилиэгин бочуоттаах олохтооҕо, урбаанньыт Иван уонна кини кэргэнэ Мария Борисовтар бэйэлэрин үлэһиттэригэр сылы түмүктүүр тэрээһини тэрийдилэр. Манна СӨ Урбааҥҥа, эргиэнҥэ уонна туризмҥа  миниистирэ Тимур Ханды сырытта.

Миниистир бу сырыытыгар Иван Борисов тэрийбит, оҥорбут эбийиэктэрин, айанньыттар аһаан ааһар “Нал”, “Уют” кафеларын, ыалдьыты хоннорор дьиэтин, гараастары, баанньыгын, бэкээринэтин, “Сайдам” ырыынагын көрдө-иһиттэ. Тимур Ханды хас биирдии эбийиэктэр тустарынан сиһилии ыйыталаста, туох эбии тутуллуон сөбүн туһунан тоһоҕолоон чопчуласта, сүбэ-ама биэрдэ. Кини элбэх үлэ миэстэтин таһааран дьону үлэлэтэ сылдьарын иһин урбаанньыкка махтанна, инникитин бииргэ үлэлэһиэх буолла. Бу көрсүһүү кэнниттэн нэһилиэк аҕа баһылыга Петр Эверстовы кытта инники былааннары торумнаатылар.

Салгыы Тимур Ханды өрөспүүбүлүкэҕэ биллэр норуот маастара, тимир ууһа, араас таһымнаах куонкурустар кыайыылаахтара Леонид Говоров бэйэтэ оҥостубут мастарыскыайыгар  ыалдьыттаата. Манна сахалыы быһахтары, батастары уо.д.а көрөн сөхтө уонна инникитин кини үлэлэрэ киэҥ эйгэҕэ тахсарыгар баҕарда.

Ити кэннэ нэһилиэккэ Надежда Оконешникова салайааччылаах “Сайдам” уопсастыбаннай түмсүү үлэтин, тугунан дьарыктаналларын сиһилии билистэ. Бу түмсүүгэ  эйэҕэс эбээлэр туох ситиһиилээхтэрин, инники былааннарын билиһиннэрдилэр.

Иван Борисов  “Айылгы” балаҕаныгар бары үлэһиттэрэ сылы түмүктүүр тэрээһиҥҥэ тоҕуоруһа муһуннулар. Манна үлэһиттэри Тимур Ханды эҕэрдэлээтэ уонна наҕараадалары туттарда. Ол курдук “Урбаан, эргиэн үлэтин сайдыытын иһин” бэлиэни Айталина Петрова, Любовь Сметанникова, Анна Реева ыллылар, ону таһынан махтал суруктары бастыҥ үлэһиттэр туттулар. Урбаанньыт Иван Иванович хас биирдии үлэһиттэригэр сыл түмүгүнэн махтанан туран анал бэлэхтэри туттарда. Сүүйүүлээх оонньууга бааттаахтарга морозильник, холодильник, истиэҥкэ, хомуот, тэлэбиисэр тигистэ.

Уола Юрий Иванович үлэһиттэргэ махтанан туран туоһу суруктары, тэлэбиисэрдэри туттарда. Сылы түмүктүүр киэһэҕэ  үлэһиттэр сүрдээх үчүгэй саҥа дьыллааҕы көрдөрүүгэ кытыннылар. Үлэһиттэр ааттарыттан Иван Ивановичка махтал суругу туттарылынна. Еремей Гоголев, Линда Захарова, Кирилл Матвеев ылбаҕай ырыаларын иһиттилэр.

Иван Борисов бииргэ үөрэммит үөлээннээхтэрэ харда тыл эттилэр уонна кининэн киэн тутталларын, үлэтигэр өссө элбэх ситиһиилэри,  сонун идиэйэлэри, былааннара олоххо киирэригэр баҕардылар.

Вера Владимирова,

Дьокуускай.

Хаартыскалар В.Владимирова тиксэриилэрэ.