Бороҕоҥҥо, Аллараа Бэстээххэ Аҕам саастаахтар кииннэрэ аһылыннылар

Социальнай пуонда салаатын иһинэн Аҕам саастаах дьон алтыһар кииннэрэ Уус Алдан уонна Мэҥэ Хаҥалас улуустарыгар аһылыннылар.

Бэс ыйын 26 күнүгэр Бороҕоҥҥо «Мүрү» киин, бэс ыйын 27 күнүгэр Аллараа Бэстээххэ «Көхтөөх уһун үйэлэнии» киинэ аһыллан, ааннарын тэлэччи арыйдылар.

Онон Саха сиригэр Социальнай пуонда иһинэн үлэлиир 10 Аҕам саастаах дьон киинэ баар буолла. Бу кииннэр аҕам саастаах дьону түмэр, аралдьытар, иллэҥ кэмнэрин туһалаахтык атааралларыгар көмөлөһөр сыаллаахтар.

Кииҥҥэ маастар-кылаастар, доруобуйаны бөҕөргөтөр, уһун үйэлэнэр туһунан лиэксийэлэр, көмпүүтэри баһылыырга, үбү сатаан туттарга, түөкүттэртэн сэрэхтээх буоларга дьарыктар, чэбдигирдэр сэрээккэлэр, дуобат-саахымат турнирдара, о.д.а. буолаллар.

Аҕам саастаах дьон туох эрэ дьарыктаах, сыаллаах-соруктаах буолаллара, күннэтэ үөлээннээхтэрин кытта билсэ, сэлэһэ кэлэллэрэ, саҥаны билэн-көрөн, үөрэнэн бараллара — бу барыта уһун үйэлэнэллэригэр, үөрэ-көтө сылдьалларыгар, олохторун хаачыстыбата тупсарыгар көмөлөөх.