Бороҕоҥҥо Лөгөй Тойон болуоссата саҥардыллыа

Сахабыт сирэ күн-түүн сайдан, тупсан иһэр. Бу сайдыы биир чаҕылхай холобурунан Уус Алдан улууһун Бороҕон сэлиэнньэтигэр Лөгөй Тойон аатынан киин болуоссат саҥардыллар бырайыага буолар.

Бу бырайыак, элбэх атын бырайыактартан талыллан, өрөспүүбүлүкэ үгүс олохтоохторун куоластааһынын ылан оҥоһуллар диэн «Биир ньыгыл Арассыыйа» баартыйа Саха сиринээҕи салаата иһитиннэрэр. Болуоссат тупсарыытын былаана сэлиэнньэни эрэ буолбакка, улуус бүтүннүүтүн кэскилин түстүүр улахан суолталаах.

Болуоссакка туох саҥа баар буолуой?

1. Лөгөй Тойон пааматынньыга оннунан хаалыа. Пааматынньыктары харыстыыр, саҥардар уонна чэбэрдик тутар наадатын дьон бары өйдүөхтээх. Ол иһин кини бастакы миэстэҕэ турар.
2. Территорияҕа сезонунан хас даҕаны павильон үлэлиэхтээх. Манна дьоҕус биисинэс, дьон бэйэтин оҕуруотун аһын, уус-уран оҥоһуктары – ол иһигэр сувенирдары – атыылыыр туочукалара тутуллуохтара. Бу олохтоох урбааны өйүүр үчүгэй ньыма.
3. Болуоссат – бу дьону тардан киин сир, онон манна мэлдьи араас тэрээһиннэр, кэнсиэрдэр ыытыллыахтара. Ол иһин сыана наада. Ол сыана хомуллан-тардыллар конструкциялаах буолуоҕа.
4. Ханнык баҕарар үчүгэйдик оҥоһуллубут болуоссат – көҕөрдүүлээх буолар. Болуоссаты отунан-маһынан, сибэккинэн симиир былаан баар, үгүс сыллаах үүнээйилэргэ ураты болҕомто ууруллуоҕа.
5. Болуоссакка араас көлүөнэ, араас идэлээх уонна интэриэстээх дьон көрсүһүөхтэрэ. Онон дискуссиялары ыытарга аналлаах остуоллаах буолуо (ким баҕарар, саахыматтаах уонна остуол оонньуулардаах кэлэригэр аналлаах).
6. Болуоссат араас навигационнай элеменнэринэн, аныгы кыра архитектурнай формаларынан, олорор ыскамыайаларынан, уурналарынан, сырдатыы остуолбаларынан, күрүөлэринэн, массыына тохтобулунан уонна биир сыллаах үүнээйи олордорго кашполарынан хааччыллыаҕа – барыта биир тэҥ дизайннаах буолуоҕа.

Уус Алдан улууһун Бороҕон сэлиэнньэтигэр баар Лөгөй Тойон киин болуоссатын саҥардыы бырайыага РФ Тутууга министиэристибэтин уонна «Биир ньыгыл Арассыыйа» баартыйа тупсарыыга аналлаах уонна дизайн-бырайыактарын талыыга ыытыллыбыт онлайн-куоластааһыныгар кыайыылаах буолла. Куоластааһын федеральнай «Табыгастаах куорат эйгэтин тэрийии» бырайыак, «Олох инфраструктурата» национальнай бырайыак уонна баартыйа «Куорат эйгэтэ» федеральнай бырайыак чэрчитинэн ыытыллыбыта.