Бороҕоҥҥо мини-футболга күрэхтэһиэхтэрэ

Олунньу 28 күнүттэн кулун тутар 3 күнүгэр диэри Бороҕоҥҥо бастакы лигалаах хамаандалар ортолоругар мини-футболга өрөспүүбүлүкэ чөмпүйэнээтэ ыытыллаары турар. Күрэхтэһии успуорт саҥа дыбарыаһыгар буолар итиэннэ Н.Тарскай төрөөбүтэ 100 сылыгар ананар.

Өрөспүүбүлүкэ хамаандалара Арассыыйа мини-футболун ассоциациятын быраабылатынан күрэхтэһиэхтэрэ. Миэстэлэһэр иһин күүстээх киирсии буолара сабаҕаланар.

Чөмпүйэнээт буолуо хас да күн инниттэн, хамаандалар бөлөҕүнэн түһүмэххэ утарылаһааччыларын биллилэр:

«А» бөлөххө киирэллэр Нам, Нерюнгри, Горнай, Мииринэй улуустара уонна Дьокуускай.

«В» бөлөххө Ленскэй, Уус Алдан, Орто Халыма, Мэҥэ Хаҥалас уонна Жатай киирэллэр.

Маны сэргэ, онлайн- быһа көрдөрүү, плей-офф уонна чөмпүйэнээт түмүктүүр оонньууларын көрдөрүү былааннанар.

Санатан эттэххэ, Бороҕоҥҥо успуорт саҥа дыбарыаһыгар мини-футбол, баскетбол, волейбол күрэхтэһиилэрин ыытыахха сөп. Эбийиэк иэнэ –  8000 кв. м. Успуорт дыбарыаһа РФ Бэрэсидьиэнэ Владимир Путин көҕүлээбит «Демография» национальнай бырайыак иитинэн, «Спорт — олох нуормата» федеральнай бырайыак өйөбүлүнэн тутуллубута.

СӨ Ил Дарханын уонна бырабыыталыстыбатын пресс-сулууспата