Бороҕоҥҥо сэргэх тэрээһин буолла

Уус Алдан улууһугар бибилэтиэкэ тэриллибитэ 100 сылыгар, РФ Конституциятын күнүнэн С.С. Васильев-Борогонскай аатынан оройуоннааҕы киин бибилэтиэкэ кэккэ сэргэх тэрээһиннэри ыытта.

Ол курдук, 2024 сыллаахха саҥа көлүөнэ модельнай бибилэтиэкэ статуһун ылыы үөрүүлээхтик бэлиэтэннэ. Кинигэни таптаан ааҕааччыларын уонна кэлэктииби улуустааҕы култуура управлениетын начаалынньыга С.С. Нафанаилов, Г.В. Егоров аатынан 1 №-дээх оскуола дириэктэрэ П.П.Баханов эҕэрдэлээтилэр.
2007 сылтан үтүө үгэс буолбут РФ эдэр гражданнарыгар пааспары туттарыы сиэрэ-туома ыытылынна. Бу күн улууспут 20 эдэр олохтооҕо долгуйан туран миграционнай сулууспа улуустааҕы салаатын салайааччытыттан А. Т.Окоемоваттан пааспардарын уонна өйдөбүнньүк бэлэхтэри туттулар.

Оҕолорго истиҥ эҕэрдэлэрин “Биир ньыгыл Арассыыйа” баартыйа Уус Алданнааҕы салаатын толорооччу сэкирэтээрэ К.П.Рощина, улуустааҕы үөрэх управлениетын начаалынньыгын солбуйааччы И.И.Никонов, “Бастыҥнар хамсааһыннара” Арассыыйатааҕы оҕо уонна ыччат түмсүүтүн куратора М. П.Винокурова тиэртилэр. Иһирэх ырыанан Мүрү 2 №-дээх орто оскуолатын 5 кылааһын үөрэнээччитэ Алик Стручков эҕэрдэлээтэ.
Эбиэттэн киэһэ Конституцияны билиини тургутуу аахсыйатыгар бибилэтиэкэ былаһааккатыгар 105 киһи кыттыыны ылла.

Февронья Федорова,

Уус Алдан.

Евдокия Неустроева хаартыскаларга түһэриитэ