Бороҕоннооҕу оҕо ускуустубатын оскуолата “Дьиэ кэргэн” национальнай бырайыак иитинэн хаҥатыллыбыт

Уус Алдан улууһун Бороҕоннооҕу оҕо ускуустубатын оскуолатын материальнай-тиэхиньиичэскэй баазата биллэрдик хаҥаабыт. Дойду бэрэсидьиэнэ Владимир Путин көҕүлээһининэн олоххо киирбит “Дьиэ кэргэн” национальнай бырайыак чэрчитинэн, муусука саҥа инструменнара, аныгы тэрил, үөрэх матырыйааллара баар буолбуттар.

“Муусука салаатыгар элбэх инструмены ыллыбыт, бу — “Сонато” пианино, баян, домра, балалайка, саксофон, гитара, флейта, скрипка, ону тэҥэ, нуота литэрэтиирэтэ, үөрэх босуобуйата. Бу курдук хааччыйыы оҕо талаанын арыйарга, уопсайынан, үүнэр көлүөнэ духуобунай өттүнэн сайдарыгар улахан көмөлөөх” – диэн муусука салаатын сэбиэдиссэйэ, теория дьиссипилиинэтин преподавателэ Инга Ильина бэлиэтиир.

“Дьиэ кэргэн” национальнай бырайыак иитинэн быйыл өрөспүүбүлүкэҕэ сэттэ муусука оскуолатыгар 27 мөл. солк. тахса суумалаах саҥа муусука инструменнарын, тэрили уонна үөрэх литэрэтиирэтин тириэрдибиттэр.  Ити туһунан Ил Дархан уонна Бырабыыталыстыба пресс-сулууспата суруйар.