Борокуратуура көҕүлээһининэн норуот дьокутаатын боломуочуйата тохтотулунна

СӨ Борокуратуурата быһаарбытынан, Ил Түмэн дьокутаата хоруупсуйаны утары охсуһар сокуоҥҥа олоҕуран, баайын-дуолун туһунан сибидиэнньэни биэрэр эбээһинэһин толорботох. Ити дьокутаат боломуочуйатын болдьоҕун иннинэ тохтоторго халбаҥа суох төрүөтүнэн ааҕыллар. Бу туһунан СӨ Борокуратууратын пресс-сулууспата иһитиннэрэр.

Ол курдук, бэҕэһээ, ахсынньы 23 күнүгэр, Ил Түмэн 16-с уочараттаах пленарнай мунньаҕар  өрөспүүбүлүкэ борокуратууратын этиитин учуоттаан, норуот дьокутаатын боломуочуйатын тохтотор туһунан быһаарыыны ылынна. Урут бу дьокутаакка судаарыстыбаннай хантараактары толорууга кэммиэрчэскэй тэрилтэлэр салайааччыларыттан 150 тыһ. солк. саҕалаан 4,5 мөл. солк. диэри суумалаах бэриги ылбыт чахчытынан РФ Холуобунай кодексатын 290-с ыстатыйатын 2-с, 5-с («в» пууна) уонна 6-с чаастарынан холуобунай дьыала көбүтүллүбүтэ.

Билиҥҥи туругунан холуобунай дьыала суукка көрүллэ сылдьар, дьыалаҕа судаарыстыбаннай буруйдааһыны өрөспүүбүлүкэ борокуратууратын аппараата өйүүр.