Борокуратуура кулуттаан үлэлэтии туһунан холуобунай дьыаланы суут көрүүтүгэр ыыттыаҕа

Силиэстийэ көрүүтүнэн, буруйданааччылар — уоллаах аҕа икки эр киһини көҥүл сылдьар бырааптарын кэһэн, кулут оҥосторго усулуобуйаны тэрийбиттэр. Кинилэртэн биирдэстэрэ улахан психологическай ыарыылаах эбит.

Өрөспүүбүлүкэ борокуруорун үрдүкү көмөлөһөөччүтэ: “Силиэстийэ көрүүтүнэн эр дьонтон биирдэстэрэ урбаанньыт быһыытынан сүөһү иитиитинэн дьарыктаммыт, ону тэҥэ, кини аҕата  2025 сыл кулун тутарыттан муус устар ыйга диэри Ньурба улууһун Күндээдэ сэлиэнньэтин сиригэр икки киһини тутарга кулуттааһын усулуобуйатыгар туппуттар. Эмсэҕэлээччилэр куһаҕан усулуобуйаҕа олорбуттар, ол иһигэр баанньыкка уонна хотоҥҥо, кинилэргэ мэдиссиинэ көмөтө оҥоһуллубатах. Оробуочай быһыытынан өрөбүлэ, хамнаһа суох үлэлээбиттэр, күүстэринэн тутар инниттэн кэмиттэн-кэмигэр кырбыыллар эбит.   Биирдэстэрин наручник кэтэрдэн, сыаптаан хотон маһыгар баайбыттар. Онон эмсэҕэлээччилэр кинилэргэ сүктэриллибит тыа хаһаайыстыбатын үлэтин толорорго күһэллибиттэр. Буруйданааччыларга буруйдуур түмүк куопуйатын туттарбыттарын кэннэ холуобунай дьыаланы Ньурба улууһун борокуратуурата өрөспүүбүлүкэ суутун көрүүтүгэр ыытыаҕа”, — диэн иһитиннэрэр. Бу туһунан Борокуратуура телеграм ханаалыгар суруйаллар.