Борокуруор ирдэбилинэн Бүлүү улууһугар 85 саастаах дьахтар дьиэнэн хааччылынна

Бүлүү улууһун борокуратуурата 85 саастаах дьахтар кыыһын сайабылыанньатынан аҕам саастаах олорор дьиэҕэ бырааба тутуһуллуутун бэрэбиэркэлээтэ.

Сайабылыанньаһыт ийэтэ 1980 сыллаахха тутуллубут, саахалланар туруктааҕынан билиниллэн көтүрүллүөхтээх мас дьиэҕэ олороро быһаарыллыбыт. Ол да буоллар, муниципалитет киниэхэ атын олорор дьиэни биэрбэтэх.

Борокуруор ирдэбилинэн аҕам саастаах дьахтар бырааба чөлүгэр түһэрилиннэ, кини саҥа элбэх кыбартыыралаах дьиэҕэ кыбартыыранан хааччылынна, диэн СӨ Борокуратуурата иһитиннэрэр.