Борокуруор тэрилтэ дириэктэрэ итэҕэлин сүтэрбитинэн ууратарга модьуйда

Чурапчы улууһун борокуратуурата коррупцияны утары охсуһар сокуону хайдах тутуһулларын бэрэбиэркэлээтэ.

Түмүгэр олохтоох дьаһалта тэрийбит «Маарыкчаан» муниципальнай унитарнай тэрилтэ дириэктэринэн дьаһалта исписэлииһэ үлэлиирэ чопчуламмыт. Итинэн сибээстээн, улуус борокуратуурата «Чакыр нэһилиэгэ» тыа сирин баһылыгын аатыгар этии киллэрбит. Ону көрүү түмүгүнэн дириэктэри кытта үлэ тохтотуллубут. Түбэлтэ улахан суолталааҕынан уонна дуоһунастаах сирэй итэҕэлин сүтэрбитинэн сибээстээн, үлэттэн ууратыыга тиэрдэринэн, улуус борокуратуурата үлэттэн ууратыы төрүөтүн уларытар туһунан  сайабылыанньатынан суукка тахсыбыт. Суут борокуратуура туруорсуутун кытта сөбүлэһэн, кэккэ ирдэбиллэрин толорбут. Суут быһаарыыта сокуоннай күүһүгэр киирэ илик, диэн СӨ Борокуратуурата суруйар.