Боротуоха кытылын хомуйдулар

Дойду үрдүнэн «Особенности национальной уборки» аахсыйа ыытыллар. Бэс ыйын 26 күнүгэр бу аахсыйа Дьокуускайга эмиэ ыытылынна.

«Особенности национальной уборки» диэн Арассыыйаҕа ыытыллар айылҕа харыстабылын аахсыйата олохтоох үгэстэри уонна хас биирдии эрэгийиэн уратытын учуоттаан туран, сири-уоту ыраастыырга олохтоохтору кытыннарарга туһуланар. Аахсыйаҕа кыттааччылар сири-уоту ыраастыылларын таһынан, айылҕаны харыстааһын, бөҕү-саҕы туспа хомуйуу уонна айылҕа харыстабылын култууратын атын өрүттэрин туһунан билиини ылаллар.
Аахсыйа чэрчитинэн, ыраастааһын үксүгэр дьиҥнээх бырааһынньыкка кубулуйар, онно олохтоохтор, айар бөлөхтөр уонна бырабыыталыстыба үлэһиттэрэ кыттыыны ылаллар, ол тэрээһини өссө көхтөөх, маассабай оҥорор.

Бу аахсыйаны тэрийэр «Компас» пуонда дириэктэрэ  Татьяна Ковалева кэпсээбитинэн, кылгас кэм устата Арассыыйаҕа 300-тэн тахса  туонна бөх хомулунна, 30 тыһыынчаттан тахса киһи кытынна. Кыттар эрэгийиэннэри элбэтэн иһэр былааннаахтар. Саха сирэ Ингушетия кэнниттэн 25-с эрэгийиэн буолла, бу кэнниттэн эстафетаны Новосибирскай  тутуоҕа.

Дьокуускайга аахсыйа кыттыылаахтара Күөх Хонуу аттынан, боротуоха кытылын Петр Бекетов пааматынньыгыттан 203-с түөлбэҕэ диэри хомуйдулар. Бу кытылынан дьон элбэхтик күүлэйдиир, спортсменнар сүүрэр, оҕолор бэлэсипиэттиир сирдэрэ.

Экология, айылҕаны туһаныы уонна ойуур хаһаайыстыбатын миниистирэ Евгений Перфильев этэринэн, бу сири хомуйарга табыгастаах диэн талбыттар. Бу тэрээһин министиэристибэ көҕүлээбит «Зеленый четверг» өрөспүүбүлүкэтээҕи аахсыйа чэрчитинэн ыытылынна.

Өрөспүүбүлүкэ бырабыыталыстыбатын бэрэссэдээтэлин солбуйааччы Ольга Балабкина бырайыак 2023 сылтан ыла ыытылларын бэлиэтээтэ.

— «Особенности национальной уборки» аахсыйа сүрүн сыала-соруга – ыраас буолууга болҕомтону тардыы. Саха сирин хас биирдии олохтооҕо атын эрэгийиэннэргэ курдук, бэйэтэ олорор куората уонна өрөспүүбүлүкэтэ тупсубутун, ыраас айылҕалааҕын көрүөн баҕарар. Онон маннык хамсааһыннарга кыттыы уонна өйөбүл олус суолталаах, — диэн тоһоҕолоон бэлиэтээтэ.