Босхо учаастак оннугар харчынан төлөбүр суумата үрдүөҕэ

Элбэх оҕолоох дьиэ кэргэттэргэ бэриллэр учаастак оннугар харчынан толуйуу суумата үрдүөҕэ. Ил Дархан Айсен Николаев бу сууманы үрдэтэр туһунан соруйда. Маны тэҥэ, бу төлөбүрү туһаныы хайысхата кэҥээтэ.

2023 сылтан элбэх оҕолоох дьиэ кэргэттэр босхо сир учаастагыттан аккаастанар буоллахтарына, 200 тыһыынча солкуобай бэриллэр буолбута. Бу маннык төлөбүрү 3 тыһыынчаттан тахса ыал ылан туһанна диэн үлэ, социальнай сайдыы министиэристибэтэ иһитиннэрэр.

Оттон бу төлөбүрү 100 тыһыынча солкуобайынан үрдэтэн, 300 тыһыынча солкуобайга тиэрдиэхтэрэ.

— Сир учаастагын оннугар харчынан толуйууну ылаллара суолталаах. Бу харчынан толуйуу сууматын үрдэтиэххэ уонна туһаныы хайысхаларын кэҥэтиэххэ наада. Дьиэ кэргэттэр бу харчыны туохха туһаналларын бэйэлэрэ талыахтаахтар, — диэн Айсен Николаев мунньах кэннитэн эттэ.