Босуобуйаҕа сайабылыанньаны биэрии саҕаланыа

Ахсынньы 28 күнүттэн “Госуслуги” порталга биир кэлим (универсальнай) босуобуйаҕа сайабылыанньаны биэрии саҕаланар. Оттон социальнай көмүскэл управлениетыгар уонна Элбэх өҥөнү оҥорор кииҥҥэ (МФЦ) тохсунньу 9 күнүттэн эрэ ылаллар. Ол эрээри, сайабылыанньаны хаһан биэрбитиҥ көрүллэр болдьоҕор дьайбат.

Сайабылыанньаҕа оҕолор ааттарын, бастайааннай уонна быстах бырапыысканан аадырыстары суруйаҕыт. Дьиэ кэргэн бастайааннай бырапыыската атын эрэгийиэҥҥэ буоллаҕына, сайабылыанньаны ханна биэрэллэрин бэйэлэрэ талаллар. Бырапыыска олох да суох буоллаҕына, олорор сирдэрин аадырыстара суруллар. Бу икки түгэҥҥэ 10 үлэ күнүн иһигэр бигэргэтэр докумуоннарын илдьэн көрдөрүөхтээхтэр.

Сайабылыанньа 35 үлэ күнүн устата көрүллэр. Босуобуйаны аныырга туох ирдэбил баарый?

Дьиэ кэргэн дохуота хас биирдии чилиэнигэр тиксэринэн, эрэгийиэҥҥэ олохтоммут тиийинэн олоруу алын кээмэйиттэн кыра буоллаҕына, бэриллэр. Улахан дьон үлэлиир, эбэтэр, үлэлээбэккэ олороллоро бигэргэммит төрүөттээх буолуохтаах (холобур, оҕону көрөн олоруу, байыаннай сулууспа, о.д.а.). Баай-дуол (дьиэ, тырааныспар, уурунуу харчы, о.д.а.) бигэргэммит испииһэктэн элбэх буоллаҕына, босуобуйа анаммат.

Баай-дуол испииһэгэ:

1 кыбартыыра (эбэтэр, дьиэ кэргэн хас биирдии чилиэнигэр тиксэринэн, 24 кв.м. кыра иэннээх буоллаҕына, хас да кыбартыыра көҥүллэнэр);

1 олорор дьиэ (эбэтэр, дьиэ кэргэн хас биирдии чилиэнигэр тиксэринэн, 40 кв.м. кыра иэннээх буоллаҕына, хас да дьиэ көҥүллэнэр);

1 даача;

1 гараас (элбэх оҕолоох дьиэ кэргэттэргэ, инбэлииттэргэ – 2 гараас);

1 учаастак (куоракка – 0,25 га, тыа сиригэр – 1 га);

1 массыына, 1 матассыыкыл.

Социальнай көмө быһыытынан бэриллибит сир, дьиэ, Уһук Илин гектаара уопсай баайга ааҕыллыбат. Элбэх оҕолоох уонна инбэлиит оҕолоох төрөппүттэргэ икки массыына буолуон сөп.

Дохуоту ааҕарга тиэхиньикэни эмиэ учуоттууллар. Биир массыыналаах, биир матассыыкыллаах, биир катердаах, эбэтэр, мотуордаах оҥочолоох ыал кыаммат диэн ааттаныан сөп. Элбэх оҕолоох, эбэтэр, дьиэ кэргэҥҥэ ким эрэ инбэлиит буоллаҕына, икки массыына, икки матасыыкыл буолуон сөп. Ол эрээри, массыына мотуора 250 ат күүһүттэн улахан уонна 5 сылтан саҥа буоллаҕына, босуобуйаны биэрбэттэр (аны ыал 4 оҕолоох, массыына 5 миэстэлээх буоллаҕына, биэрэллэр эбит). Биир тыраахтар (комбайн, катер, мотуордаах оҥочо, о.д.а.) баар буолуон сөп. Бу тиэхиньикэ 5 сылтан ордук туһаныллыбыт, эргэ буоллаҕына, ааҕыллыбат.

Бааҥҥа уурунуу харчы бырыһыана тиийинэн олоруу алын кээмэйиттэн үрдүк буоллаҕына, босуобуйа бэриллибэт.

Онон, дьиэ кэргэн кыбартыыралаах, дьиэлээх уонна даачалаах буоллаҕына, босуобуйа бэриллэр. Икки массыыналаах уонна икки оҕолоох буоллаҕына – бэриллибэт. Сайабылыанньаҕа ыйыллыбыт оҕоҕо бэриллэр төлөбүрдэр дохуот быһыытынан ааҕыллыбаттар.