Бу буруйу барытын биир киһи оҥорбут

Үөһээ Бүлүү улууһун олохтооҕо икки киһи доруобуйатын эчэтэн уонна итирик туруктаах массыына ыытан сууттаммыт.

32 саастаах сууттанааччы бу сыл ыам ыйын 9 күнүгэр бииргэ арыгылаабыт киһитин кытта айдаарсан баран, бейсболлуур маһынан кырбаабыт.

Сарсыныгар урукку өһүргэниитин санаан кэлэн, аны күтүөтүгэр саба түспүт, баллон крестовай күлүүһүнэн охсуолаабыт.

Аны бэс ыйын 21 күнүгэр арыгы иһэн баран үлэлиир тэрилтэтин массыынатынан дискотекалыы барбыт.

Суут судаарыстыбаннай буруйдааччы этиитин учуоттаан, Холуобунай кодекс 115 ыст. 2 ч. “в” п., 264.1 ыст. 1 ч. сууттанааччыны икки сыл устата тырааныспары ыытар быраабын быһан туран, 400 чаас булгуччулаах үлэҕэ анаабыт. Бириигэбэр күүһүгэр киирбит. Бу туһунан борокуратуура телеграм-ханаалыгар суруйаллар.