Бу өрөбүлгэ «Восточнай» космодромтан «Союз-2.1б» аракыата көтүө

2025 сыл ахсынньы 28 күнүгэр олохтоох бириэмэнэн 22:18 чааска «Восточнай» космодромтан «Союз-2.1б» аракыата көтөрө былааннанар.

Көтүү былааныгар сөп түбэһиннэрэн, аракыата туттуллубут чаастара Саха сирин хас да улууһугар түһүөхтэрэ. Куттал суох буолуутун хааччыйар сыалтан, Алдан, Өлүөхүмэ, Бүлүү уонна Үөһээ Бүлүү улуустарыгар кэтээн көрүүгэ уонна хонтуруолга ылыахтара.
Онон, бу улуустар олохтоохторугар, тэрилтэлэргэ аракыата ыытыллар күнүгэр ыраах ойуурга, үүтээҥҥэ сылдьымаҥ диэн сүбэлииллэр. Бу кэмҥэ үөһэ ыйыллыбыт улуустарга бултууру, хаһаайыстыбаннай эбэтэр туризм тэрээһиннэрин ыытыы бобуллар.
Куттал суох буолуутун хааччыйарга баар наадалаах бары миэрэлэр ылыныллыбыттар уонна СӨ Гражданскай оборуонаҕа уонна нэһилиэнньэ олоҕун куттала суох буолуутун министиэристибэтин хонтуруолугар тутуллар.