Ыал буолбуттара 20, 30, 40, 50 сыл буолбут диэн сонуну бары сэргии, үөрэ-көтө истээччибит. Олортон саамай билэрбит, арааһа, сиитэстэн саҕалаан мас, фарфор, чөмчүүк, үрүҥ көмүс, кыһыл көмүс, бирилийээн сыбаайбалар буолуо.
Салгыы манна көрүөҕүҥ:
- Күөх сыбаайба — кэргэннии буолар күн ааттанар. Бэлиэтэ — соҕуруу дойдуга үүнэр үрүҥ сибэккилэрдээх мирт мас сэбирдэхтэрэ.
- Сиитэс сыбаайба — уоллаах кыыс бииргэ олорбуттара биир сылын туолуута. Бу күн тапталлаахтар бэйэ-бэйэлэригэр сиитэс былааттары, эбэтэр солкоттон, нейлонтан, хлопоктан тигиини бэлэхтэһэллэр.
- Кумааҕы сыбаайба — бииргэ олорбуттара 2 сыла. Бу сыбаайбаҕа кумааҕыттан, пластмассаттан оҥоһуктары, эбэтэр миэбэл бэлэхтиэххэ сөп.
- Тирии сыбаайба — 3 сыл бииргэ олорууну бэлиэтээһин. Тирииттэн араас оҥоһуктары, таҥаһы бэлэхтэһэллэр.
- Лүөн сыбаайба — 4 сыл олоруу. Натуральнай эбэтэр синтиэтикэ лүөнтэн таҥас бэлэхтииллэр.
- Мас сыбаайба — 5 сыллаах үбүлүөй. Бу сыбаайба хайаан да бэлиэтэниллиэхтээх. Аймахтары, доҕоттору ыҥыран сыбаайбаны санатар курдук тэриллиэн сөп. Бу күн кэргэнниилэр бэйэ-бэйэлэригэ мас оҥоһуктары бэлэхтэһэллэр.
- Чугуун сыбаайба — 6 сыл. Чугуун оҥоһуктары бэлэхтэниллэр.
- Сыыҥкабай сыбаайба — ыал буолан олорбуттара 6,5 сылын бэлиэтиир сыбаайба. Аата да этэринэн, бу күн сыыҥкабай иһити бэлэхтэһиллэр.Сыыҥка иһит кэргэннии сыһыаны кэмиттэн-кэмигэр аалан-сотон таптал маҥнайгы төлөнүн сөргүтэр наадатын санатар.
- Алтан сыбаайба — 7 сыл. Кэргэнниилэр инники дьоллоох олох туһугар алтан манньыаттары атастаһаллар. Ыалдьыттар алтан бижутерияны, атын да оҥоһугу бэлэхтиэхтэрин сөп.
- Ылтаһын (ньаалбаан) сыбаайба — 8 сыл. Бу күн кэргэнниилэр ньаалбаан иһиттэри бэлэхтэһэллэр. Эбэтэр боруонсаттан статуэткалары,олоххо-дьаһахха туттуллар прибордары бэлэхтиэххэ сөп.
- Роза сыбаайба — 10 сыл. Бырааһынньыкка кэргэнниилэр сыбаайбаларыгар туоһу буолбуттар уонна ол саҕанааҕы доҕотторо ыҥырыллаллар. Эр киһи кэргэнигэр роза сибэкки букетын бэлэхтиир.
- Ыстаал сыбаайба — кэргэнниилэр олорбуттарын 11 сыла туолуута. Хаһаайыстыбаҕа туттуллар араас иһити-хомуоһу, уо.д.а. бэлэхтиэххэ сөп.
- Никелевай сыбаайба — 12,5 сыл. Ыал буолан, аал уоту оттунанолоруугут маҥнайгы кылаанын сүтэримэҥ диэн санатар. Сэбиэскэй кэминээҕи никельтэн оҥоһуллубут манньыат бэлэхтэнэр.
- Куруһуба сыбаайба — 13 сыл. Куруһуба былаат, саҕа, саал былаат бэлэхтиэххэ сөп.
- Агат сыбаайба — 14 сыл. Агат бижутерия, муостан оҥоһук — табыгастаах бэлэх.
- Өстүөкүлэ сыбаайба — 15 сылы бэлиэтиир кэрэ-бэлиэ күн. Кэргэнниилэр сыһыаннара өстүөкүлэ курдук ыраас, дьэҥкир буоларын бэлиэтиир өстүөкүлэ оҥоһуктары бэлэхтэһэллэр.
- Фарфор сыбаайба — 20 сыл. Бырааһынньыктааҕы остуолу саҥа фарфор иһитинэн тардаллар.
- Үрүҥ көмүс сыбаайба — 25 сыл. Ыраах-чугас аймах барыта ыҥырыллар. Кийиит кыыс маҥан сибэккинэн симэммит хоруоната үрүҥ көмүһүнэн солбуллар. Кыһыл көмүс биһилэхтэрин аттыгар үрүҥ көмүс биһилэҕи кэтэллэр.
- Чөмчүүк сыбаайба — 30 сыл бэлиэтиир күн. Бу күн эр киһи кэрэ аҥаарыгар чөмчүүк таастартан тиһиллибит моонньуга кэтэр киэргэли бэлэхтиир. Суолтата — бииргэ олорбут отут сылларын хас биирдии күнэ күндүтүн ити чөмчүүк таастар санаталлар диэн.
- Болотуна сыбаайба — 35 сыл. Кэргэнниилэр бэйэ-бэйэлэригэр лүөн соттордору эбэтэр ыскаатардары бэлэхтэһэллэр. Ити бэлэхтэрэ бииргэ олороллорун тухары сулууспалыахтаах.
- Алюминий сыбаайба — 37,5 сыл.
- Рубин сыбаайба — 40 сыл. Кыһыл көмүс биһилэххэ рубин (гранат) тааһы олордоллор. Рубин — уот уонна таптал бэлиэтэ.
- Сапфир сыбаайба — 45 сыл. Сапфир, турмалин бэлэхтэниллэр.
- Кыһыл көмүс сыбаайба — 50 сыл. Үксүгэр үйэ аҥаара кэтиллэн эргэрбит уонна тарбах уларыйан сөп түбэспэт буолбут биһилэхтэри бу күн уларыталлар.
- Бриллиант сыбаайба — 60 сылы бэлиэтиир күн. Бу сыыппара кэргэнниилэр сыһыаннара алмаас таас курдук бигэтин туоһулуур.
- Тимир сыбаайба — 65 сыл.
- Махтал сыбаайба — 70 сыл.
- Короннай сыбаайба — 75 сыл.
- Платина сыбаайба — 100 сыл. Уһун үйэлээх ыал дэҥҥэ көстүөн сөп. Оннук ыалга уруй-айхал этиллэр.
Саха ыалын халандаарыттан,
«Айар», 2007 с.