Бу күннэргэ магнитнай буурҕа буолар дуо?

Тохсунньуга Күҥҥэ улахан эстии тахсан, корональнай «дьөлөҕөс» үөскээбитэ. Бу кэнники сылларга биир саамай улахан эстии буолар. Бу «дьөлөҕөспүт» Күнү эргийэн кэлэн баран, эмиэ  Сир диэки хайыста. Бу «дьөлөҕөстөн» күүстээх, түргэн «күн тыала» үрэр. Онон, бу күннэргэ магнитнай буурҕа буолар дуо?

Күн астрономиятын лабораторията иһитиннэрбитинэн, плазма түргэнэ 600-700 км/сөк диэри түргэтиэн сөп (билигин 300-400 км/сөк). Ол эрээри, олунньу 11 күнүгэр магнитнай буурҕа түһэ илик, лаборатория көрдөрөрүнэн, кыра хамсааһын (магнитные возмущения) баар.

«Дьөлөҕөс» үөскээбитин кэнниттэн, тохсунньуга Сиргэ улахан магнитнай буурҕа түһүө диэн аймаммыттара даҕаны, улахан, күүстээх буурҕалар түспэтэхтэрэ. Тоҕо диэтэр, «күн тыала» Сири халты ааспыт буолуон сөп. Онон бу да сырыыга халты ааһыан сөп диэн учуонайдар этэллэр. Ол да буоллар, Саха сиригэр хотугу улуустарга дьүкээбиллэр суһумнаабыттара.

Олунньу 11 күнэ үүнэр түүнүгэр Сирбит «күн тыалын» кытыытыгар син биир түбэстэ. Манна баттааһын түргэнник уларыйар буолан, бу түүн Сир магнитнай хонуута хамсаата эрээри, буурҕаҕа тиийбэтэ. Онон бу күннэргэ магнитнай буурҕа түһүөн сөп эрээри, олус күүстээх буолуо суоҕа диэн кэтээн көрөр учуонайдар этэллэр.

РАН Күн-Сир физикатын институтун Күн астрономиятын лабораторията тохтоло суох Күнү кэтээн көрөр, магнитнай хамсааһыннары бэрэбиэркэлиир, күннүктэри таһаарар.