Бу нэдиэлэҕэ сорох улуустарынан -55С кыраадыска тиийэ тымныйыа

Бу нэдиэлэҕэ Саха сиригэр салгын температурата нуорматтан намыһах буолара билгэлэнэр. Өрөспүүбүлүкэ сорох улуустарынан —55С кыраадыска тиийэ тымныйыа, диэн Арассыыйа гидрометсулууспатын научнай салайааччыта Роман Вильфанд иһитиннэрдэ.

Роман Вильфанд этэринэн, Саха сиригэр кэлэр үс күн устата салгын температурата нуорматтан 6-8 кыраадыстан намыһах буолуоҕа. Тымныылар —55 кыраадыска тиийиэхтэрэ.

«Оннооҕор Саха сирин соҕуруу өттүгэр салгын температурата —40…-45 кыраадыска тиийэ тымныйар», — диир Арассыыйа гидрометсулууспатын научнай салайааччыта.

Саха УГМС иһитиннэрбитинэн, бэҕэһээ сарсыарда, кулун тутар 3 күнүгэр, минус —45…-50 кыраадыска диэри тымныылар Батамайга, Куйгаҕа, Ньурбаҕа, Үөһээ Бүлүүгэ, Теплай Ключка, Депутатскайга, Усуйаанаҕа бэлиэтэммиттэр. Кэккэ нэһилиэнньэлээх пууннарынан тымныыттан сибээстээн оскуолаларга дьарыктара тохтотуллубут.